Oğuz və Qəbələdə baş vermiş yanğınların qarşısı alınıb
Bakı, 5 avqust (AZƏRTAC). Avqustun 3-də Şahdağ Milli Parkının Oğuz meşəbəyliyinin 8-ci və Milli Parkın Qəbələ bölməsinin Bum meşəbəyliyinin 10-cu dolaylarında baş vermiş yanğınlarla əlaqədar Ekologiya və Təbii Sərvətlər Nazirliyinin (ETSN) müvafiq yerli qurumları fövqəladə iş rejiminə keçiblər.
Hadisə yerinə cəlb olunmuş nazirliyin 300-dən artıq əməkdaşı Fövqəladə Hallar Nazirliyinin (FHN) yerli qurumlarının əməkdaşları ilə birgə bütün istiqamətdə yanğınların artıq lokallaşdırılmasına nail olublar.
ETSN-in mətbuat xidmətindən AZƏRTAC-a bildirilib ki, yanğınlar yüksək dağlıq əraziləri əhatə etdiyindən və küləklə müşayiət olunduğundan tam olaraq söndürülməsində çətinliklər yaranmışdı. İlkin hesablamalara görə, yanğın Oğuzda 6 hektar, Qəbələdə isə 7 hektar ərazini əhatə edib.
Hazırda yanğınların tam söndürülməsi istiqamətində operativ tədbirlər görülür.
Bölmənin digər xəbərləri
