OKTYABRIN 6-DA KEÇİRİLƏCƏK BƏLƏDİYYƏ SEÇKİLƏRİNİ 1000-DƏN ÇOX MÜŞAHİDƏÇİ İZLƏYƏCƏK
Mərkəzi Seçki Komissiyasından AZƏRTAC-a bildirmişlər ki, oktyabrın 6-da ölkə üzrə 82 dairədə 603 bələdiyyəyə (164 bələdiyyə tam tərkibdə seçiləcək) seçki keçiriləcəkdir. Təşkil olunmuş 940 seçki məntəqəsində 1931 nəfər bələdiyyə üzvü seçiləcək. Seçkidə iştirak edəcək seçicilərin sayı 810 minə yaxındır. Dairə seçki komissiyalarından imza vərəqi götürmüş 4686 nəfərdən 4641-i imza vərəqələrini və lazım olan digər sənədləri DSK-lara təqdim etmişdir. Onlardan isə 4638-nin namizədliyi dairə seçki komissiyaları tərəfindən təsdiqlənmişdir. Sonra 3 nəfər seçkidən iştirakdan imtina etmiş, 102 nəfər namizədliyini geri götürmüş, Apelyasiya məhkəməsi 1 nəfərin namizədliyini ləğv etmişdir. Seçkilərdə iştirak edəcək 4524 namizəddən 239-u qadındır.
Namizədlərin 2171-i Yeni Azərbaycan Partiyasının, qalanları digər partiyaların üzvləri və bitərəflərdir. Namizədliyi qeydə alınanlardan 23-ü siyasi mənsubiyyətini göstərməyib. Bitərəflərin sayı 2096 nəfərdir.
Bu seçkiləri 1000-dən çox müşahidəçi izləyəcək ki, onların da 31 nəfəri beynəlxalq müşahidəçilərdir.
Bölmənin digər xəbərləri
