ONASSİSİN NƏVƏSİ OLİMPİYA ÇEMPİONUNA ƏRƏ GETMİŞDİR

05.12.2005 [13:41]
Çap et
A⁺ A^-

AZƏRTAC xəbər verir ki, Röyter agentliyinin yaydığı məlumata görə, multimilyarder Aristotel Onassisin nəvəsi Afina Russel Onassis atçılıq idmanı üzrə Olimpiya çempionu braziliyalı Alvaro Affonso de Mirandaya ərə getmişdir.

Braziliyanın San-Paulu şəhərində keçirilən nikah mərasiminə dünyanın bir çox ölkələrindən 750-dən artıq qonaq toplaşmışdı. Jurnalistlər bildirmişlər ki, qızının seçimini bəyənməyən atası Tyerri Russel toy mərasimində olmamışdır. Onassis və Miranda qonaqlardan toy hədiyyəsi əvəzinə, yerli xeyriyyə mərkəzinə ianə köçürməyi xahiş etmişlər.

Dünyanın ən zəngin qadınlarından sayılan Afina Onassisin (onun var-dövləti 2,7 milyard dollardır) nikah mərasiminin təhlükəsizliyini mühafizə agentliklərinin 400-dən çox əməkdaşı təmin edirdi. Qonaqlar mərasimə gəlmək üçün 2 əsaslı yoxlamadan keçmişlər.

İlk nikah gecəsini şəhərin hotellərindən birində keçirən ər-arvad naməlum istiqamətdə toy səyahətinə çıxmışdır.