Ötən il ETSN işdə yol verdikləri nöqsanlara görə xeyli əməkdaşını cəzalandırmışdır
Bakı, 6 fevral (AZƏRTAC). Ekologiya və Təbii Sərvətlər Nazirliyi (ETSN) tərəfindən 2013-cü ildə korrupsiyaya qarşı ciddi mübarizə tədbirləri görülmüşdür.
Nazirliyin mətbuat xidmətindən AZƏRTAC-a bildirmişlər ki, işində ciddi nöqsan və qanunsuzluqlara yol verdiklərinə görə Bakı Şəhər Ekologiya və Təbii Sərvətlər Departamentin direktoru və 14 əməkdaşı tutduqları vəzifədən azad edilmiş, 7 nəfərə töhmət verilmiş, 1 nəfər isə aşağı vəzifəyə keçirilmişdir.
ETSN-in Ətraf Mühitin Mühafizəsi Departamenti tərəfindən aparılan araşdırmaların nəticələrinə əsasən, fəaliyyətlərində yol verdikləri ciddi pozuntulara görə 9 əməkdaş, o cümlədən 5 və 9 saylı ərazi ekologiya və təbii sərvətlər şöbələrinin rəisləri, 4 saylı ərazi ekologiya və təbii sərvətlər şöbəsinin hüquq məsələləri üzrə baş məsləhətçisi, 5 saylı ərazi ekologiya və təbii sərvətlər şöbəsinin rəis müavini və ətraf mühitin mühafizəsinə nəzarət sektorunun müdiri tutduqları vəzifədən azad edilmişlər. Bundan əlavə, 1, 2, 3, 4, 5 və 9 saylı ərazi ekologiya və təbii sərvətlər şöbələrinin ümumilikdə 38 əməkdaşı barəsində intizam tənbeh tədbirləri görülmüşdür.
Meşələrin İnkişafı Departamentinin tabeliyində olan müəssisələrdə aparılan yoxlamalar zamanı 9646 kubmetr həcmində 66285 manat məbləğində aktlaşdırılmamış özbaşına (qanunsuz) qırıntı faktı aşkar edilərək hüquqi qaydada sənədləşdirilmişdir. Yoxlamaların nəticələrinə uyğun olaraq Goranboy, Zaqatala, Cəlilabad və Şamaxı meşə mühafizəsi və bərpası müəssisələrinin direktorları, habelə Qusar və Cəlilabad meşə mühafizəsi və bərpası müəssisələrinin baş meşəbəyləri tutduqları vəzifədən azad edilmiş, ümumilikdə Nazirlik və Departamentin nomenklaturasına aid olan 166 nəfər cavabdeh vəzifəli şəxs barəsində intizam tənbeh tədbirləri görülmüş, onlardan 66 nəfəri işdən çıxarılmış, 56 nəfərə töhmət, 44 nəfərə sonuncu xəbərdarlıqla şiddətli töhmət verilmişdir. Məsələyə hüquqi qiymət verilməsi məqsədi ilə təqsirkarlar barəsində qanunamüvafiq tədbirlərin görülməsi və meşə fonduna dəymiş ziyanın ödətdirilməsi üçün 111361 manat ziyan məbləğində 100 iş aidiyyəti üzrə hüquq-mühafizə orqanlarına göndərilmişdir.
Qax Meşə Mühafizəsi və Bərpası Müəssisəsinin 7 meşə dolayında aparılmış araşdırmalar zamanı mühafizə xidmətinin zəif fəaliyyəti nəticəsində ümumilikdə 435.15 kubmetr həcmində 2387.18 manat köküstə nırx dəyərində 328 ədəd aktlaşdırılmamış özbaşına qırıntı aşkar olunmuş, buna görə hesablanmış ziyan təqsirkarların hesabına ödənilmiş, müəssisə direktoru və 11 meşə mühafizə işçisi barəsində intizam tənbeh tədbirləri görülmüş, 6 meşə gözətçisi tutduğu vəzifədən azad olunmuşdur.
Zaqatala Meşə Mühafizəsi və Bərpası Müəssisəsində də meşələrin mühafizə olunması vəziyyəti araşdırılan zaman ciddi faktlar üzə çıxarılmışdır. 56 meşə dolayında mühafizə xidmətinin zəif fəaliyyəti nəticəsində 2708,12 kubmetr həcmində 1316 ədəd müxtəlif cins və diametrli yaş köküstə ağacın qanunsuz kəsilərək meşə sahəsindən aparıldığı aşkar olunmuş, dəymiş ziyandan 16172,46 manatın təqsirkarlar tərəfindən ödənilməsi təmin edilmiş, müəssisənin direktoru və əraziyə cavabdeh 8 meşə gözətçisi tutduqları vəzifədən çıxarılmış, 13 meşə mühafizə işçisi barəsində digər intizam tənbeh tədbirləri görülmüşdür.
Bioloji Müxtəlifliyin Qorunması və Xüsusi Mühafizə Olunan Təbiət Ərazilərinin İnkişafı Departamenti tərəfindən də tabeli qurumların ərazilərində yoxlamalar aparılmış, aşkar edilmiş qanun pozuntularına görə 72 nəfər mühafizə işçisi barəsində intizam tənbeh tədbirləri görülmüşdür. O cümlədən milli park və dövlət təbiət qoruqlarında əmək müqaviləsi üzrə öhdəliklərini yerinə yetirmədiklərinə görə 2 sahə müfəttişinin və 9 mühafizə yegerinin əmək müqavilələri ləğv edilmiş, 6 sahə müfəttişinə və 24 mühafizə yegerinə sonuncu xəbərdarlıqla şiddətli töhmət, 7 sahə müfəttişinə, 17 mühafizə yegerinə isə töhmət verilmişdir.
İşdə yol verdikləri nöqsan və vəzifə pozuntularına görə Hirkan Milli Parkının direktoru, Zaqatala Dövlət Təbiət Qoruğunun direktoru və mühafizə üzrə direktor müavini, Ağgöl Milli Parkının baş mühasibi tutduqları vəzifədən azad edilmiş, bir sıra məsul milli park və qoruq əməkdaşı barəsində ciddi intizam tənbeh tədbirləri tətbiq edilmişdir.
“Azərbaycan Yaşıllaşdırma və Landşaft Quruluşu” ASC-nin tabeli qurumlarında da bir sıra yoxlamalar həyata keçirilmiş və ASC-nin 6 saylı Yaşıllaşdırma İdarəsinin xidməti ərazisində ciddi faktlar aşkar edilmişdir. Aparılmış araşdırmalar zamanı məlum olmuşdur ki, idarənin direktoru çöl-sahə işlərini düzgün təşkil etməmiş, yaşıllıqların salınması işinə səhlənkar yanaşaraq ağaclara aqrotexniki qaydalara uyğun qulluq göstərilməsini təmin etməmiş və digər vəzifə pozuntularına yol verərək əmək müqaviləsi üzrə öhdəliklərini yerinə yetirməmiş, nəticədə ərazidə əkilmiş 78 000 ağacdan 55538 ədədinin qurumasına şərait yaratmışdır. Bu əməllərinə görə ASC-yə 91 000 manat məbləğində ziyan vurulmuşdur. Buna görə idarənin direktoru tutduğu vəzifədən azad edilmiş və tərtib olunmuş sənədlərdə cinayət tərkibinin əlamətləri olduğundan toplanmış materiallar Azərbaycan Respublikasının Baş Prokurorluğuna göndərilmişdir.
Bölmənin digər xəbərləri
