“Özbəkistan-Azərbaycan” Dostluq Cəmiyyəti Xocalı soyqırımının 30-cu ildönümü ilə əlaqədar bəyanat yayıb
Daşkənd, 22 fevral, АZƏRTAC
“Özbəkistan-Azərbaycan” Dostluq Cəmiyyəti Xocalı soyqırımının 30-cu ildönümü ilə əlaqədar bəyanat yayıb.
AZƏRTAC xəbər verir ki, bəyanat müvafiq qurumlara göndərilib.
Bəyanatda deyilir: “Hesab edirik ki, Xocalı qətliamını soyqırımı kimi nə qədər çox dünya dövləti, beynəlxalq təşkilat rəsmi olaraq tanısa və gənc nəsillərə çatdırılsa, bu, gələcək sülhə, insanlığın xoşbəxt və təhlükəsiz yaşamasına bir o qədər faydalı olar.
Biz 30 il ərzində Azərbaycan hökumətinin ölkənin ərazi bütövlüyünün sülh yolu ilə bərpa olunması, Azərbaycanın qanunsuz zəbt olunmuş keçmiş Dağlıq Qarabağ bölgəsi və ona bitişik yeddi rayonun geri qaytarılması üçün nə qədər böyük səylər göstərdiyinin şahidi olduq. Lakin mövcud problemin sülh yolu ilə həllinə yönəlmiş cəhdlərə baxmayaraq işğalçıların növbəti təxribat xarakterli hərəkətlərindən sonra uzanan münaqişə 2020-ci ildə öz məntiqi nəticəsini və həllini tapdı.
Qarabağ münaqişəsinin mövcud olduğu illər ərzində Özbəkistan dövləti, xalqımız, xüsusən də “Özbəkistan-Azərbaycan” Dostluq Cəmiyyətinin nümayəndələri Azərbaycanın haqq işinə daim dəstək göstərmiş, qanunsuz olaraq işğal olunmuş Azərbaycan ərazilərinin azad olunması ilə bağlı BMT-nin Təhlükəsizlik Şurasının qəbul etdiyi 4 qətnaməsinin icra olunmasını tələb edib.
Hesab edirik ki, dinc əhaliyə qarşı zorakılıq, qətliam və soyqırımların həyata keçirilməsi siyasəti insani dəyərlərinin və beynəlxalq hüquq normalarının kobud surətdə pozulmasıdır.
1992-ci il fevralın 25-dən 26-na keçən gecə Azərbaycanın Xocalı şəhərində baş verən və bütün insanlığı lərzəyə gətirən, tarixə “Xocalı faciəsi”, “Xocalı soyqırımı” kimi düşən, tarixdə isə “qara ləkə” kimi qalan hadisələrin 30 ili tamam olur. O gecə artilleriya atəşindən qaçan yüzlərlə müdafiəsiz qadın, uşaq, yaşlı azərbaycanlı erməni terrorçuları tərəfindən təqib edilərək xüsusi qəddarlıq və amansızlıqla öldürülüb və dinc əhaliyə qarşı xüsusi qətliam, soyqırımı həyata keçirilib.
Rəsmi məlumata görə həmin gün 63-ü uşaq, 106-sı qadın, 70-i qoca olmaqla 613 nəfər vəhşicəsinə öldürülüb. Bundan başqa, statistika göstərir ki, 8 ailə tamamilə məhv edilib, 25 uşaq hər iki valideynini itirib, 487 nəfər xəsarət alıb, o cümlədən 76-sı uşaq olmaqla 150 nəfər itkin düşüb. Təbii ki, bu məlumatlar soyqırımı zamanı insan tələfatı və dəymiş maddi və mənəvi zərərin tam statistikası deyil.
Dünyanın 17 dövləti, İslam Əməkdaşlıq Təşkilatının üzvü olan ölkələr və ABŞ-ın 24 ştatı Xocalı faciəsini rəsmi olaraq soyqırımı kimi tanıyan qətnamə qəbul edib.
Biz bu soyqırımında həyatlarını itirən dinc insanların əziz xatirəsini hörmətlə anmaqla bu cür dəhşətli qeyri-insani hadisələrin bir daha təkrarlanmamasını və bu qanlı cinayətin təşkilatçılarının ədalət qarşısında mühakimə olunmasını tələb edirik. “Özbəkistan-Azərbaycan” Dostluq Cəmiyyəti olaraq Azərbaycan xalqına qarşı həyata keçirilmiş soyqırımı siyasətini qətiyyətlə pisləyir, qardaş Azərbaycan xalqının kədərinə şərik olduğumuzu və bu faciəli hadisələri daim kədər, üzüntü ilə xatırladığımızı bildiririk”.
“Özbəkistan-Azərbaycan” Dostluq Cəmiyyətinin üzvləri Daşkənddəki Heydər Əliyev adına Azərbaycan Mədəniyyət Mərkəzi ilə birlikdə hər il Xocalı soyqırımına həsr olunmuş tədbirlər keçirir, bu soyqırımında şəhid olan insanlarımızın əziz xatirəsini ehtiramla yad edir.
Biz bir daha öz torpaqlarının azadlığı uğrunda Vətən savaşına çıxmış və böyük, şanlı tarix yazmış qürurlu, qəhrəman, tolerant, öz qonaqpərvərliyi ilə məşhur olan Azərbaycan xalqının yanında olduğumuzu bildiririk.
Vətən uğrunda öz əziz canlarından keçən azərbaycanlı şəhidlərin, gənclərin qəhrəmanlıq şücaəti təkcə azərbaycanlılar üçün deyil, bütün Türk xalqlarının, özbəklərin, eləcə də bəşər insanının qəlblərində daim ehtiramla və rəhmətlə yad edilir və ediləcək”.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
