QAN YADDAŞI
Pakistan mətbuatında Xocalı soyqırımının 30-cu ildönümü ilə bağlı məqalələr dərc olunub
İslamabad, 23 fevral, AZƏRTAC
Pakistanın geniş oxucu kütləsinə malik “The Nation”, “Daily İttehad” kimi qəzetlərində və “Pakistan Economic Net” xəbər agentliyində Xocalı soyqırımının 30-cu ildönümü ilə əlaqədar “Xocalı soyqırımı - XX əsrin faciəsi” və “Xocalı faciəsi: Ermənistan tərəfindən azərbaycanlılara qarşı törədilmiş soyqırımı” sərlövhəli məqalələr dərc olunub.
AZƏRTAC xəbər verir ki, məqalələrdə bu il fevralın 26-da Xocalı soyqırımının 30-cu ildönümünün anılacağı qeyd edilir, bu faciənin təkcə Azərbaycan xalqına qarşı deyil, bütün bəşəriyyətə qarşı törədilmiş cinayət olduğu vurğulanır.
Yazılarda 1992-ci il fevralın 25-dən 26-na keçən gecə sovet imperiyasının 366-cı motoatıcı alayının köməyi ilə erməni hərbi birləşmələrinin Xocalı şəhərinə hücum edərək azərbaycanlı dinc sakinləri qətlə yetirdikləri qeyd olunur.
Müəlliflər Ermənistanın Azərbaycan xalqına qarşı törətdiyi soyqırımının 613 nəfərin, o cümlədən 106 qadın, 63 uşaq, 70 yaşlının həyatına son qoyduğunu, 1275 dinc sakinin əsir götürüldüyünü, onlardan 150 nəfərin taleyinin hələ də məlum olmadığını, 475 nəfərin yaralandığını, 8 ailənin tam məhv edildiyini, 25 uşağın hər iki valideynini, 130 uşağın isə valideynlərindən birini itirdiyini diqqətə çatdırıblar.
Məqalələrdə, eyni zamanda, məhz Azərbaycanın ümummilli lideri Heydər Əliyevin Xocalı soyqırımının mahiyyətini ortaya qoyduğu, onun təşəbbüsü ilə 1994-cü ilin fevralında Azərbaycan Milli Məclisinin bu cinayətə hüquqi və siyasi qiymət verən xüsusi sənəd qəbul etdiyi barədə danışılır.
Materiallarda Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” beynəlxalq kampaniyasına da toxunulur, Fond tərəfindən dünya ictimaiyyətinin məlumatlandırılması məqsədilə həyata keçirilən fəaliyyətdən bəhs olunur.
Yazılarda 2020-ci ilin sentyabrında Azərbaycanın öz torpaqlarını işğaldan azad etməsi, 44 günlük müharibə zamanı Ermənistanın dinc əhalini hədəfə aldığı, 11-i uşaq olmaqla 100-dən çox azərbaycanlını xüsusi qəddarlıqla qətlə yetirdiyi diqqətə çatdırılır.
Məqalələrdə Azərbaycan və Pakistan xalqlarının erməni vəhşiliyinin günahsız qurbanlarını dərin hörmət və ehtiramla yad etdikləri diqqətə çatdırılır, Xocalı soyqırımının Pakistanın da daxil olduğu bir sıra ölkələr tərəfindən tanınaraq qınandığı bildirilir.
Qulu Kəngərli
AZƏRTAC-ın xüsusi müxbiri
İslamabad