Payız mövsümündə 1003 hektar ərazidə meşə salınması nəzərdə tutulub
Bakı, 14 oktyabr, AZƏRTAC
Bu ilin payızında respublika üzrə 1003 hektar ərazidə meşə salınması nəzərdə tutulub. Buraya həm meşə əkini, həm də toxum səpini tədbirləri daxildir. Elə ərazilər var ki, relyef orada əkin işləri aparılmasına imkan vermir. Belə ərazilərdə toxumsəpmə işləri aparılır.
Bunu AZƏRTAC-a müsahibəsində Meşələrin İnkişafı Xidmətinin meşəbərpa şöbəsinin müdiri Vahid Fərzəliyev deyib.
Onun sözlərinə görə, azad edilmiş ərazilərdə mina təhlükəsi davam etdiyindən minalardan təmizlənən ərazilərin xəritəsinə uyğun olaraq əkin işləri həyata keçirilir: "Minalardan təmizlənən ərazilərin xəritəsi bizə təqdim olunur. Yalnız ondan sonra həmin ərazilərdə ağac əkini, toxum səpini aparırıq. Əkin işləri zamanı həmin ərazilərin meşələrinə xas bitkilərin əkilməsinə çalışırıq.
Məsələn, Zəngilanın aşağı ərazilərində vaxtilə çinar meşələri olub. Yaşıllaşdırma zamanı orada daha çox çinar ağaclarının əkininə üstünlük veririk".
Bölmənin digər xəbərləri
