Azərbaycan Respublikası Prezidentinin “Sahibkarlığın inkişafına mane olan müdaxilələrin qarşısının alınması haqqında” 2002-ci il 28 sentyabr tarixli Fərmanından irəli gələn vəzifələrin yerinə yetirilməsini təmin etmək məqsədi ilə Vergilər Nazirliyi vergi orqanlarının mövcud strukturunun müasir tələblərə uyğunlaşdırılması istiqamətində ardıcıl həyata keçirdiyi tədbirləri davam etdirir. Nazirliyin ictimaiyyətlə əlaqələr şöbəsindən AZƏRTAC-a bildirmişlər ki, vergilər nazirinin 20 dekabr 2002-ci il tarixli əmri ilə Bakı Şəhəri Baş Vergilər İdarəsi və paytaxtın 11 rayon idarələri ləğv edilmiş, yeni vergi orqanı - Bakı şəhəri Vergilər Departamenti yaradılmışdır. Departamentin tərkibinə 3 filial daxildir. Birinci filial Qaradağ, Səbail və Yasamal rayonlarını, ikinci filial Binəqədi, Nərimanov və Nəsimi rayonlarını üçüncü filial isə Nizami, Xətai, Əzizbəyov, Sabunçu və Suraxanı rayonlarını əhatə edir. 

Yoxlama-nəzarət işinin mexanizmini təkmilləşdirmək məqsədi ilə audit və operativ nəzarət funksiyaları yalnız Bakı Şəhəri Vergilər Departamentinin müvafiq filialları tərəfindən həyata keçiriləcəkdir. Stuktur dəyişiklikləri nəticəsində Bakı şəhəri üzrə vergi işçilərinin sayının 50 faizədək azaldılması nəzərdə tutulur. Yeni yaradılmış departamentin əməkdaşları paytaxtın ləğv olunmuş vergi orqanlarına əmək qanunvericiliyinə müvafiq işdən azad edilmiş işçilərin arasından seçiləcəkdir. Bu iş yanvarın 6-dan 20-dək müsahibə yolu ilə təşkil ediləcəkdir. Müsahibənin keçirilməsi nazirlikdə yaradılmış xüsusi komissiyaya həvalə olunmuşdur.