Pərvin Kərimzadə: Elektromobil istehsalı Türkiyə sənayesinin böyük uğurudur
Bakı, 7 aprel, AZƏRTAC
Qardaş Türkiyə Prezident Rəcəb Tayyib Ərdoğanın liderliyi ilə ötən illər ərzində böyük nailiyyətlərə imza atıb. Xüsusilə, hərbi sənaye ilə yanaşı, digər sahələrdə də baş verən inkişaf qardaş ölkənin dünyada nüfuzunu və gücünü daha da artırır. Bu baxımdan, “Togg” elektromobilinin istehsalı da Türkiyə sənayesinin böyük uğuru kimi dəyərləndirilməlidir.
Bu fikirləri Milli Məclisin deputatı Pərvin Kərimzadə AZƏRTAC-a açıqlamasında deyib.
O bildirib ki, “Togg”un kütləvi istehsal zavodunun rəsmi açılış mərasimi ötən il oktyabrın 29-da keçirilib. Zavod Bursa vilayətinin Gemlik rayonunda inşa olunub. 2020-ci ildə təməli qoyulan zavodun inşası iki ilə tamamlanıb. Zavodun açılışı ilə yerli avtomobilin kütləvi istehsalı prosesi başlanıb. Tədbirdə iştirak edən Türkiyə Prezidenti Rəcəb Tayyib Ərdoğan “Togg” elektromobilini sınaqdan keçirib. Rəcəb Tayyib Ərdoğan bildirib ki, il ərzində 175 min avtomobil istehsal olunacaq, 2030-cu ilə qədər istehsal bir milyonu ötəcək. “Togg” elektromobilləri “Pamukkale”, “Anadolu”, “Gemlik”, “Kula”, “Oltu” və “Kapadokya” olmaqla altı rəngdə istehsal olunur. Avtomobil iki modifikasiyada - 200 və 400 at gücündə elektrik mühərriki ilə buraxılır. Elektromobilin maksimal gediş məsafəsi isə 500 kilometrə yaxındır. Avtomobillərin hazırlanması zamanı onların ətraf mühit üçün tam zərərsiz olmasına xüsusi diqqət yetirilib.
Deputat xatırladıb ki, aprelin 4-də “Togg” elektromobili Azərbaycan Prezidenti İlham Əliyevə təqdim olunub. Türkiyə Prezidenti Rəcəb Tayyib Ərdoğan “Togg” elektromobilinin Azərbaycan Prezidentinə təqdim olunması ilə bağlı paylaşım edib. Türkiyə Prezidenti paylaşımında bildirib: “Qardaşım İlham Əliyev də Türkiyənin qüruru “Togg”u təhvil aldı. Xeyirli olsun. Allah gözəl günlərdə istifadə etməyi nəsib etsin, qardaşım”. Prezident İlham Əliyev isə Türkiyə Prezidenti Rəcəb Tayyib Ərdoğana təşəkkür edib. Dövlətimizin başçısı bununla bağlı tviterdə paylaşımında qeyd edib: “Togg” Sizin liderliyiniz altında qardaş Türkiyənin elmi-sənaye potensialının inkişafının daha bir bariz nümunəsidir”.
Pərvin Kərimzadə vurğulayıb ki, Prezident İlham Əliyev Türkiyənin sənaye və texnologiya naziri Mustafa Varankı qəbul edərkən qardaş ölkədə son illərdə həm müdafiə sənayesi, həm də mülki sənaye sahələrində yüksək texnoloji məhsulların istehsal olunduğunu qeyd edib. Azərbaycan Prezidenti vurğulayıb ki, bu, Türkiyə Prezidenti Rəcəb Tayyib Ərdoğanın liderliyi ilə Türkiyə xalqının zəkası, istedadı və əməyi nəticəsində ərsəyə gəlib və “Togg”un istehsalına başlanması da bu baxımdan yaxşı nümunədir. Dövlətimizin başçısı “Togg” elektromobilinin ikincisinin ölkəmizdə olmasını dostluq və qardaşlıq münasibətlərimizin təzahürü kimi dəyərləndirib. Ümumiyyətlə, 20 ildə Türkiyə Rəcəb Tayyib Ərdoğanın liderliyi ilə böyük və şərəfli yol keçib, dünyada söz sahibi olaraq güc mərkəzinə çevrilib. Bu gün dünyada Türkiyə ilə hesablaşmağa məcburdurlar. Türkiyənin hərbi gücünü, müdafiə sənayesi sahəsində böyük uğurlarını indi dünyada hər kəs görür. Bu illər ərzində Türkiyədə davamlı sabitliyin təmin olunması, ölkənin inkişafı bütün Türk dünyası üçün önəmli şərtdir. Azərbaycan qardaş Türkiyənin uğurlarına hər zaman sevinir. Prezident İlham Əliyevin dediyi kimi, Türkiyənin gücü Azərbaycanın gücü, Azərbaycanın gücü isə Türkiyənin gücüdür. Bizim qardaşlığımız əbədi və sarsılmazdır!
Bölmənin digər xəbərləri
