DÜNYA
Polşa şirkətləri müharibədən sonra Ukraynanın yenidən qurulmasında yaxından iştirak edəcəklər
Vyana, 10 aprel, AZƏRTAC
Polşa şirkətləri müharibədən sonra Ukraynanın yenidən qurulmasında yaxından iştirak edəcəklər.
AZƏRTAC xəbər verir ki, Polşa hökumətinin sözçüsü Piotr Müller ötən günlərdə Varşavada Polşa və Ukrayna dövlət rəhbərləri arasında müharibə nəticəsində dağılmış Ukraynanın bərpasına dair imzalanmış əməkdaşlıq memorandumunu şərh edərkən bildirib. O qeyd edib ki, digər şəhərlərlə yanaşı Xarkovda ictimai infrastrukturun bərpası Polşa şirkətlərinin yenidənqurma işlərində iştirak edəcəyi ilk layihələr sırasında yer alacaqdır.
P. Müller konkret müqavilələrlə bağlı danışıqların davam etdiyi üçün bütün detalların tezliklə təqdim ediləcəyini bildirib.
Silah sənayesində Polşa-Ukrayna əməkdaşlığı və Ukrayna istehsalının bir hissəsinin Polşaya köçürülməsi ehtimalı ilə bağlı sualı cavablandıran hökumət sözçüsü silahların birgə istehsalı ilə bağlı danışıqların davam etdiyini, lakin onların bir az daha mürəkkəb olduğunu etiraf edib və bu mövzuda açıqlama verə bilməyəcəyini bildirib.
Qeyd edilməlidir ki, müharibə başlayandan Ukraynaya hərbi və humanitar dəstək göstərən Polşa bu ölkənin müharibədən sonra inkişafında da əsas tərəfdaşlardan biri sayılır. Bu məqsədlə bu ilin fevral ayında Polşanın ev sahibliyi etdiyi “ReBuild Ukraine“ yenidənqurma yarmarkası yerli və xarici şirkətlərin böyük marağına səbəb olub.
Elgün Niftəli
AZƏRTAC-ın xüsusi müxbiri
Vyana