Postsovet məkanında beynəlxalq əməkdaşlıq: keçmiş sovet respublikaları və beynəlxalq siyasət nəzəriyyələri
Bakı, 10 aprel, AZƏRTAC
Bakı Dövlət Universitetinin (BDU) Beynəlxalq münasibətlər kafedrasının dosenti Fərhad Hüseynovun ABŞ-nin nüfuzlu “Bloomsbury Academic” nəşriyyatı tərəfindən çap edilən “Postsovet məkanında beynəlxalq əməkdaşlıq: keçmiş sovet respublikaları və beynəlxalq siyasət nəzəriyyələri” (“International Cooperation in the Post-Soviet Space: Former Soviet Republics and Theories of International Politics”) kitabının təqdimat mərasimi keçirilib. Kitab ABŞ-nin Konqres Kitabxanasının kataloquna daxil edilib.
Bu barədə AZƏRTAC-a BDU-dan məlumat verilib.
Milli Məclisin Ailə, qadın və uşaq problemləri komitəsinin sədri, BDU-nun Diplomatiya və müasir inteqrasiya prosesləri kafedrasının müdiri professor Hicran Hüseynova mövcud ikitərəfli və çoxtərəfli əməkdaşlıq formatlarının təhlükəsizlik məsələləri kontekstində qiymətləndirildiyi tədqiqat əsərini yüksək qiymətləndirib. O diqqətə çatdırıb ki, kitabda Azərbaycanın regional siyasətinin əməkdaşlıq və sabitlik baxımından nümunə kimi göstərilməsi heç də təsadüfi deyil: “Düşünürəm ki, ABŞ-nin Konqres Kitabxanasının kataloquna daxil edilən kitab Azərbaycan dövlətinin yürütdüyü uzaqgörən və doğru siyasətin mahiyyətini dünyaya tanıtmaq üçün vasitəyə çevriləcək”.
Deputat Soltan Məmmədov böyük elmi, siyasi və geopolitik çəkiyə malik tədqiqat əsərinin regionun beynəlxalq münasibətlər sistemini öyrənmək üçün faydalı olduğunu vurğulayıb.
Azərbaycanın Bosniya və Herseqovinadakı səfiri Vilayət Quliyev yeni reallıqlar dövrünü yaşayan Azərbaycanda postsovet məkanında dövlətlərin xarici siyasət davranışlarının formalaşmasına təsir edən daxili siyasi, iqtisadi və institusional amillərin də geniş şəkildə araşdırılmağa ehtiyac duyulduğunu qeyd edib.
bp-nin Xəzər bölgəsində kommunikasiya və xarici əlaqələr üzrə vitse-prezidenti, BDU-nun Himayəçilər Şurasının üzvü Bəxtiyar Aslanbəyli tarixi hadisələrin siyasi nəzəriyyələrlə qarşılaşdırılaraq müqayisəli təhlilinin aparılmasının xüsusi peşəkarlıq tələb etdiyini və gənc nəslin təhlil bacarığının belə nümunələrlə artdığını qeyd edərək, “Postsovet məkanında beynəlxalq əməkdaşlıq: keçmiş sovet respublikaları və beynəlxalq siyasət nəzəriyyələri” kitabının bu baxımdan tələbələr üçün önəmli mənbəyə çevriləcəyinə inamını ifadə edib.
“Azərbaycan Televiziya və Radio Verilişləri” QSC-nin İctimai-siyasi proqramlar studiyasının müdiri Tofiq Abbasov, tanınmış politoloq, jurnalist Teymur Atayev, BDU-nun Beynəlxalq münasibətlər kafedrasının professorları Xalid Niyazov və Ramiz Sevdimalıyev kitabın beynəlxalq münasibətlər sistemində regional proseslərin təhlili baxımından vacib nümunə olduğunu qeyd ediblər.
Sonda kitabın müəllifi, Beynəlxalq münasibətlər kafedrasının dosenti Fərhad Hüseynov təqdimatın təşkilinə görə təşəkkür edib. Qeyd edib ki, 2022-ci ilin may ayında ABŞ-nin Kolumbiya Universitetində keçirilən beynəlxalq konfransdakı təqdimatından sonra “Bloomsbury Academic” nəşriyyatı kitabı nəşr etdirmək təklifi ilə müraciət edib. Kitab beynəlxalq akademik ictimaiyyət tərəfindən də diqqətlə qarşılanıb.
Bölmənin digər xəbərləri
