PREZİDENT CORC BUŞUN BƏYANATI HAQQINDA
Yanvarın 10-da gecə Ağ ev ABŞ Prezidenti Corc Buşun bəyanatının mətnini yaymışdır. Bəyanat xarici əməliyyatlar üçün büdcə təxsisatı haqqında qanun layihəsinin prezident tərəfindən imzalanmasına həsr edilmişdir. C.Buş demişdir ki, bu akt “ABŞ-ın xaricdə apardığı siyasətin məqsədlərinin dəstəklənməsi üçün zəruri fondları təmin edir və mənim hökumətimin ümdə məqsədi olan xərclərin azaldılmasını əks etdirir”.
Prezident bildirmişdir ki, həmin akta müvafiq surətdə verilən 15,4 milyard dollar vəsait icra hakimiyyətinin tələb etdiyi məbləğə tam uyğundur.
Belə bir məqam xüsusi maraq doğurur ki, Prezidentin bəyanatında bu aktın qüvvəsinin şamil edildiyi bütün ölkələr arasında yalnız Azərbaycanın adı çəkilmişdir: “Mən məqsədli təxsisatların məbləğinin azaldılması və qadağaların dayandırılmasına dair əlavə səlahiyyətlərin, o cümlədən 907-ci düzəlişin qüvvəsini dayandırmaq haqqında müddəanın - Azərbaycana əlavə yardım göstərilməsi üçün mənə lazımi çeviklik verən müddəanın daxil edilməsi sayəsində bu aktın yaratdığı əlavə imkanı alqışlayıram. Bu çeviklik mənim hökumətimə 11 sentyabr hücumlarından sonra meydana gəlmiş diplomatik tələbata reaksiya verməyə, habelə xarici siyasətin daim dəyişən və qarşımızda duran şərtlərini gələcəkdə də istiqamətləndirməyə imkan yaradacaqdır”
Bölmənin digər xəbərləri
