Prezident İlham Əliyevin rəhbərliyi ilə Azərbaycan böyük inkişaf yolu qət edib ŞƏRH
Bakı, 26 sentyabr, AZƏRTAC
Azərbaycan Prezidenti İlham Əliyev Nyu-Yorkda BMT Baş Assambleyasının 80-ci sessiyasındakı çıxışında 30 il işğaldan əziyyət çəkən, ədalətsizliklərlə mübarizə aparan Azərbaycanı necə dünyanın qabaqcıl dövlətlərindən birinə, qüdrətli və qalib ölkəyə çevirdiyindən danışdı.
Bunu AZƏRTAC-a açıqlamasında Milli Məclisin deputatı Mircəlil Qasımlı bildirib.
“Otuz il ərzində Prezident İlham Əliyevin rəhbərliyi ilə Azərbaycan böyük inkişaf yolu qət etdi. Bütün ikili standartlara, ədalətsiz yanaşmalara, təzyiqlərə baxmayaraq, heç bir qüvvə Azərbaycan Prezidentinin iradəsinə təsir edə bilmədi. Ölkəmiz inkişaf, tərəqqi yolu ilə inamla addımladı. Müdrikliklə müəyyənləşdirilmiş siyasət tarixi zəfərlərimizin, ərazi bütövlüyümüzün və dövlət suverenliyimizin əldə olunması ilə nəticələndi”, - deyə Mircəlil Qasımlı vurğulayıb.
Bu gün qüdrətli Azərbaycanın nəhəng yenidənqurma prosesini də uğurla icra etdiyini söyləyən deputat qeyd edib ki, dövlətimizin başçısının çıxışında qeyd etdiyi kimi, işğal dövründə Ermənistan tərəfindən yerlə-yeksan edilmiş yüzlərlə şəhər və kəndimizi, məscidlərimizi, tarixi abidələrimizi bərpa edirik. Bu gün 50 mindən çox keçmiş məcburi köçkün artıq doğma torpaqlarında yaşayır. Azərbaycan Prezidenti çıxışında Ermənistan işğalı dövründə torpaqlarımızda yerləşdirdiyi minaların yaratdığı təhlükə barədə beynəlxalq ictimaiyyətə məlumat verdi. Təxminən son beş ildə bu minalar 400-dən çox azərbaycanlı mülki şəxs və hərbçinin həyatına son qoyub.
Düşünülmüş uğurlu xarici siyasət, müdrikliklə müəyyənləşdirilmiş enerji strategiyası tarixi nailiyyətlərimizdə böyük rola malikdir. 1994-cü ildə “Əsrin müqaviləsi”nin imzalanması ilə əsası qoyulan enerji siyasəti Azərbaycanı dünyada etibarlı tərəfdaşa, güclü mövqeyə malik ölkəyə çevirdi. Neft və qaz ixrac marşrutlarının şaxələndirilməsi istiqamətində atılan addımlar, icra olunan nəhəng layihələr Avropanın enerji xəritəsini dəyişdi. Bu gün Azərbaycan qazı dünyanın 14 ölkəsinə tədarük edilir. Ötən ay Azərbaycan Türkiyə ərazisi vasitəsilə Suriyaya qaz nəqlinə başladı. Həmçinin bu gün dünyanın nüfuzlu enerji şirkətlərini ilə ölkəmizdə bərpaolunan enerji layihələrinin icrasına cəlb edilir. Bütün bunlar düşünülmüş enerji strategiyamızın parlaq uğurlarıdır.
Azərbaycan dövlətinin ölkəmizin beynəlxalq nəqliyyat mərkəzlərindən birinə çevrilməsi istiqamətində böyük işlər gördüyünü söyləyən deputat deyib: “Prezidentin dərin məzmunlu nitqində qeyd etdiyi əsas məqamlardan biri də ölkəmizdən keçən Şərq-Qərb və Şimal-Cənub nəqliyyat dəhlizləri ilə bağlı idi. Azərbaycan uzun illərdir bu layihələrin reallaşması istiqamətində səylə çalışır. Bakı-Tbilisi-Qars dəmir yolu xətti, Ələt Beynəlxalq Ticarət Limanı, beynəlxalq hava limanları, müasir yol infrastrukturu ölkəmizin beynəlxalq nəqliyyat qovşağına çevrilməsini təmin edib. Eyni zamanda Zəngəzur dəhlizinin istifadəyə verilməsi bu istiqamətdəki mövqeyimizi daha da gücləndirəcək”.
Mircəlil Qasımlı bildirib ki, cari il avqustun Azərbaycan Prezidentinin tarixi ABŞ səfəri Azərbaycan-Ermənistan münasibətləri ilə yanaşı, Azərbaycan-ABŞ əlaqələri baxımından da tarixi əhəmiyyət daşıyır. Vaşinqton Sammiti Azərbaycan-ABŞ münasibətlərində uzunmüddətli strateji tərəfdaşlıq üçün yeni səhifə açdı. Bu əməkdaşlıq siyasi, iqtisadi, enerji, müdafiə və regional təhlükəsizlik sahələrində tərəfdaşlıq imkanlarını sistemli şəkildə genişləndirəcək.
Bölmənin digər xəbərləri
