Prezident İlham Əliyevin qeyd etdiyi məsələlər - Azərbaycanın iqtisadi gücünün real mənzərəsi
Bakı, 12 yanvar, AZƏRTAC
Yanvarın 10-da Azərbaycan Respublikasının Prezidenti İlham Əliyev yerli televiziya kanallarına verdiyi müsahibədə ölkə daxili və beynəlxalq auditoriyanı düşündürən bir çox məsələlərə aydınlıq gətirdi. Dövlətimizin başçısına verilən ilk sualın ölkə iqtisadiyyatı ilə bağlı olmasının böyük əhəmiyyəti olduğunu hesab edirəm. Çünki digər bütün məsələlərin təməlində güclü iqtisadiyyat və iqtisadi müstəqilliyimiz dayanır. Bu gün Azərbaycanın xarici dövlət borcu ÜDM-in cəmi 9,8 faizini təşkil edir. Belə bir göstərici hətta inkişaf etmiş ölkələrin iqtisadiyyatlarında qeydə alınmır. İqtisadi gücümüz sayəsində işğaldan azad edilmiş ümumi ərazilərimizin 20 faizi sıfırdan yenidən qurulur. Bütün şəhərlərin Baş planları təsdiq olunub və böyük qayıdışa başlanılıb. Bu il Laçın rayonuna köçkünlərin qayıdışına start veriləcək. Ölkədə böyük sosial paketlər icra olunur. Şəhid ailələrinə və müharibə əlillərinə dövlət qayğısı göstərilir. Təbii ki, bütün bu işləri Azərbaycan dövləti öz iqtisadi gücü hesabına həyata keçirir. Bununla yanaşı, ordunun peşəkarlığının artırılması və daha müasir silahlarla silahlandırılması işi yüksək səviyyədə icra edilir. Peşəkar ordu növlərinin genişləndirilməsi prosesi davam etdirilir. Komando qoşun növləri yaradılıb. Dövlətimizin başçısının qeyd etdiyi bu məsələlər Azərbaycanın iqtisadi gücünün real mənzərəsidir.
Bu fikirləri AZƏRTAC-a açıqlamasında Milli Məclisin deputatı Azər Badamov söyləyib.
O bildirib ki, dövlətimizin başçısı müsahibəsində əhalini narahat edən məsələlərdən biri olan antiinflyasiya tədbirləri ilə bağlı fikirlər səsləndirib. Bu gün bütün dünya inflyasiya ilə üz-üzədir. Azərbaycan da dünyanın bir parçası olduğundan qlobal bazarlardakı inflyasiyanı ölkə iqtisadiyyatına idxal edir. Bununla yanaşı, dövlətimizin başçısının tapşırığı ilə antiinflyasiya tədbirləri icra olunur. O cümlədən Prezident İlham Əliyevin Sərəncamı ilə ölkəmizdə yanvarın 1-dən başlayaraq böyük bir sosial paket icra olunmağa başlayıb. Bu sosial paket demək olar ki, əhalinin bütün sferalarını əhatə edir və gəlirlərini 15 faizdən çox artırır. Halbuki 2022-ci ildə idxal olunan inflyasiya 13,9 faiz olub. Dövlətimiz öz iqtisadi imkanları çərçivəsində əhalinin sosial rifahının yaxşılaşdırılmasına xidmət edəcək tədbirləri davam etdirir.
“Prezident İlham Əliyevin toxunduğu vacib məsələlərdən biri də Azərbaycanın nəqliyyat, tranzit-logistika potensialının inkişaf etdirilməsi ilə bağlı görülmüş işlər və perspektivdə dayanan məsələlərlə bağlı olub. Əslində, bu sualın cavabı region ölkələri üçün də çox maraqlıdır. Çünki Rusiya-Ukrayna müharibəsinin başlanmasından sonra dünyanın iqtisadi bağlantılarında yeni bir nizamın yaradılması məsələsi aktuallaşıb. Dövlətimizin başçısının uzaqgörən siyasəti sayəsində ərsəyə gəlmiş Şimal-Cənub, Qərb-Şərq və Orta Dəhlizləri bu günün yeni iqtisadi nizamı üçün əvəzsiz layihələrinə çevrilib. Azərbaycanın üzərindən daşınan beynəlxalq yüklərin kəskin artması mövcud beynəlxalq nəqliyyat dəhlizlərin genişləndirilməsini və yeni dəhlizin açılması məsələsini aktuallaşdırıb. Belə ki, Bakı-Yalama dəmir yolu yenidən qurularaq Şimal-Cənub dəhlizinin yükdaşıma qabiliyyəti 30 milyon tona çatdırılıb. Ələt-Astara dəmir yolunun yenidən qurulması məsələsi planlaşdırılıb. Bakı-Tbilisi-Qars (BTQ) dəmir yolunun Gürcüstandan keçən hissəsinin genişləndirilməsi və daşıma gücünün 1 milyon tondan 5 milyon tona çatdırılması üçün 100 milyon dollar sərmayənin ayrılması, Xəzərin tranzit daşınması gücünün artırılması istiqamətində məsələlərin müzakirə olunması da ölkəmizin üzərindən beynəlxalq daşımaların əhəmiyyətli dərəcədə artmasına imkan verəcək. Amma potensial və tələb daha böyükdür. Ona görə də Zəngəzur dəhlizinin açılması labüddür və bu məsələ region ölkələrin istəyinə uyğundur. Zəngəzur dəhlizi həm də strateji məsələmizdir və 10 noyabr tarixli üçtərəfli Bəyanatın tərkib hissəsidir”, - deyə deputat diqqətə çatdırıb.
O əlavə edib ki, dövlətimizin başçısının müsahibədə toxunduğu məsələlərdən biri də dünya ictimaiyyəti üçün maraqlı olan regionun gələcəyini necə görməyimizlə bağlıdır. Prezident İlham Əliyevin qeyd etdiyi kimi, Azərbaycan yeni müharibə istəmir və avantüraya getmir. Amma bununla yanaşı, yarımçıq qalmış məsələlərin həll edilməsində israrlıdır və məqsədi isə regionda sülh və əməkdaşlıq mühitinin qurulmasıdır. Əgər Ermənistan sülh müqaviləsini imzalamaq istəmirsə, bu, onun öz işidir. Amma Azərbaycan öz məqsədlərinə çatacaqdır.
Bölmənin digər xəbərləri
