Qalib Liderin BMT tribunasından sülh mesajı ŞƏRH
Bakı, 26 sentyabr, AZƏRTAC
Birləşmiş Millətlər Təşkilatının Baş Assambleyasının 80-ci sessiyası qlobal gündəlikdə mühüm yer tutdu. Bu yubiley sessiyası dünya ölkələrini sülh, təhlükəsizlik və inkişaf kimi həyati məsələləri müzakirə etmək üçün bir araya gətirdi. Prezident İlham Əliyevin bu mühüm tədbirdə iştirakı ölkəmizin beynəlxalq hüquqa, əməkdaşlığa və kollektiv səylərə olan bağlılığını göstərməklə yanaşı, beynəlxalq münasibətlər sistemində getdikcə daha fəal və təsirli bir liderə çevrildiyini təsdiq etdi. Bu, ölkəmizin yalnız öz daxili məsələlərinə fokuslanmadığını, həm də beynəlxalq sülh, təhlükəsizlik və dayanıqlı inkişaf gündəliyinə fəal şəkildə qoşulduğunu göstərirdi ki, dövlətimizin başçısı da öz çıxışında bunu qəti şəkildə ifadə etdi.
Bu fikirləri AZƏRTAC-a açıqlamasında Milli Məclisin deputatı Fəzail İbrahimli bildirib.
Onun sözlərinə görə, Prezident İlham Əliyevin Birləşmiş Millətlər Təşkilatının 80-ci sessiyasında iştirakında ən mühüm məqam onun ali tribunadan çıxışı idisə, bu çıxışa qədər keçirilən görüşlər, diplomatik təmaslar da ölkənin beynəlxalq mövqeyini gücləndirən strateji addımlar kimi qiymətləndirilir: “Demək olar ki, həm region ölkələri arasında keçirilən görüşlər, həm də Azərbaycanın Avropa ölkələri, xüsusilə enerji təhlükəsizliyində yaxından əməkdaşlıq etdiyi Yunanıstan və İtaliya kimi ölkələr, eləcə də Ərəb ölkələri ilə münasibətləri, yeni texnologiyalardan və yaşıl texnologiyalardan istifadə istiqamətində aparılan danışıqlar, həm Azərbaycanda, həm də BMT sessiyası səviyyəsində aktiv şəkildə müzakirə olunur. Bu baxımdan Azərbaycan, Prezident İlham Əliyevin siyasəti nəticəsində enerji mənbəyinə çevrilmə istiqamətində mühüm addım atmış oldu. Prezidentin BMT sessiyası çərçivəsində keçirdiyi görüşlər həm regional sülh gündəliyinə, həm də qlobal maliyyə və enerji əməkdaşlığına dair müzakirələri əhatə edib.
Deputat qeyd edib ki, səfərin diqqətçəkən məqamlarından biri Prezident İlham Əliyevin ABŞ Prezidenti Donald Trampla səmimi söhbəti olub. Bu dialoq Azərbaycan-ABŞ münasibətlərində yeni mərhələ üçün mühüm siqnal hesab oluna bilər. Birinci vitse-prezident Mehriban Əliyeva sosial şəbəkədə həmin görüşün qısa videosunu paylaşaraq iki liderin açıq və qarşılıqlı hörmət şəraitində fikir mübadiləsi apardığını nümayiş etdirib.
“Dövlətimizin başçısının ali orqanın tribunasından birbaşa çıxışı dörd dəfə - 2004, 2010, 2017 və 2020-ci illərdə baş verib. Prezident İlham Əliyev BMT-də sonuncu dəfə 2020-ci il sentyabrın 21-də Vətən müharibəsinin başlamasından bir neçə gün öncə çıxış edib. Azərbaycan liderinin bütün çıxışlarının ana xəttində bir məsələ var idi: Ermənistanın Azərbaycan torpaqlarını işğal etməsi faktı və BMT-nin işğala son qoyulması ilə bağlı qəbul etdiyi məlum 4 qətnaməsinin icra edilməməsi. Azərbaycan lideri yorulmadan beynəlxalq müstəvidə işğal faktını gündəmə gətirir, lakin nə BMT qətnamələri icra edilir, nə də beynəlxalq hüquq təmin edilirdi. 2020-ci ilə qədər BMT tribunasından işğala son qoyulması çağırışları edən Prezident İlham Əliyev 2025-ci il sentyabrın 25-də o tribunaya ədaləti bərpa edən lider kimi çıxdı və dünyaya xitab etdi: “Biz həm müharibəni udduq, həm də sülhü qazandıq. İşğala son qoyduq və bərpa işlərinə başladıq. Son illərdə əldə etdiyimiz nailiyyətlər yalnız Azərbaycanın qələbəsi və uğuru deyil. Bu, həm də beynəlxalq hüququn sonda mütləq üstünlük təşkil etməsinin sübutudur”. Prezidentin bu mesajı təsadüfi deyil. Bir sıra dövlətlər, dairələr Azərbaycanın öz ərazi bütövlüyünü təmin edə bilməsini heyranlıqla izləyir. Azərbaycan nümunəsini öyrənirlər”, - deyə Fəzail İbrahimli vurğulayıb.
Hazırda dünyada çox mürəkkəb vəziyyətin hökm sürdüyünü diqqətə çatdıran deputat əlavə edib: “Qütbləşmə dərinləşir. Rusiya ilə Ukrayna arasında müharibənin sonu görünmür. Bu mənada Azərbaycan bir çox dövlətlər üçün örnəkdir. Prezidentin BMT tribunasından çıxışı 2020-ci ilə qədər işğala son qoyulması ilə bağlı bütün çağırışlarının beynəlxalq ictimaiyyət tərəfindən eşidilməyən Azərbaycanın kürsüyə qalib dövlət kimi qayıdış təqvimi idi. Dünya tarixinə bu təqvimi yazan İlham Əliyevin verdiyi mesajların hər biri böyük əhəmiyyətə malikdir, xüsusilə dünyanın keçmiş səhvlərdən dərs çıxarması və gələcəyinin necə qurulması baxımından. Bütövlükdə təşkilatın tarixində dünyanın heç bir dövlət başçısı mütləq hərbi-siyasi qələbənin müəllifi kimi BMT toplantılarına qatılmayıb. O, BMT Təhlükəsizlik Şurasının Ermənistan-Azərbaycan münaqişəsinə dair 822, 853, 874, 884 nömrəli qətnamələrinin icrasına təkbaşına nail olmuş və beynəlxalq hüququn aliliyini təmin etmiş lider kimi çıxış etdi. Dövlətimizin başçısı bu mesajı ilə dünyaya bildirdi ki, sülh sözdə deyil, əməldə özünü göstərməlidir. Qanunun aliliyinə hörmət edilməlidir və ikili standartlar aradan qaldırılmalıdır. Bununla da Prezident ən ali kürsüdən Azərbaycan xalqının qələbəsini, perspektivlərini və uğurlarını dünyaya çatdırdı və bundan qürur duyduğunu bir daha bəyan etdi”.
Bölmənin digər xəbərləri
