Qarasu çayının hövzəsi tullantılardan təmizlənib
Bakı, 30 oktyabr, AZƏRTAC
Ekologiya və Təbii Sərvətlər Nazirliyinə Gədəbəy rayonunun Söyüdlü kəndi ərazisindən keçən Qarasu çayı hövzəsinin tullantılarla çirkləndirilməsi ilə bağlı daxil olan məlumatı nazirliyin əməkdaşları yerində araşdırıblar.
Nazirliyin mətbuat xidmətindən AZƏRTAC-a bildiriblər ki, araşdırma zamanı Gədəbəy rayon məişət tullantıları poliqonunun hasara alınmaması səbəbindən tullantıların bir qisminin poliqona yaxın Qarasu çayı hövzəsinə atıldığı aşkarlanıb.
Faktla bağlı tullantıların idarə olunmasına cavabdeh rayonun Kommunal Müəssisələri Kombinatının direktoru Yusif Murğuzov barəsində protokol tərtib edilib və o, vəzifəli şəxs qismində 2000 manat məbləğində cərimələnib. Tullantıların ərazidən təmizlənməsi və poliqonun hasara alınması məqsədilə kombinatın direktoruna icrası məcburi olan müddətli “məcburi göstəriş” verilib.
Kombinat tərəfindən ərazi tullantılardan təmizlənib və poliqonun ətrafının metal torla hasarlanması istiqamətində işlərə başlanılıb.
Bölmənin digər xəbərləri
