Qarşıdakı həftədə dünya bazarında neftin qiyməti dəyişməz olaraq qalacaq
Bakı, 29 dekabr, AZƏRTAC
ABŞ ilə Venesuelanın münasibətlərinin yenidən gərginləşməsi dünya neft bazarında tərəddüdlərin yaranmasına səbəb olub. Ötən həftə neftin qiymətinin 1,5 və 2 dollar ətrafında sirkulyasiya etməsi treyderlərin 1 barelin vahid kursla sata bilmədiklərini göstərdi.
AZƏRTAC xəbər verir ki, “Reuters”in məqaləsində ötən həftə neftin qiymətinin enməsi və həftə sonu 2 dollara yaxın artması “qara qızıl”ın nəqlində yaranmış problemlə bağlı olub.
Rusiyanın Odessa limanını, ABŞ-ın isə Venesuela sahillərinə yaxınlaşan gəmiləri təhdid etməsi və Ukraynanın pilotsuz uçuş aparatlarının (PUA) Rusiya neftini daşıyan tankerləri Qara, Azov və Aralıq dənizlərində hədəf alması qlobal bazara təsirini göstərdi. Belə ki, bu həftə də qiymətlərin artımı gözlənilir. Lakin bu artım nəzərə çarpacaq dərəcədə olmayacaq. Məsələnin mahiyyəti ondan ibarətdir ki, ABŞ Prezidenti Donald Tramp bir daha Venesuela məsələsinə toxunaraq bildirib ki, Prezident Nikolos Madura “getməlidir”. O ABŞ əsgərlərinin Venesuelaya daxil olmayacağını, yalnız hava zərbələri endiriləcəyi ehtimalını irəli sürüb. Bu bəyanat birjalarda hərəkətlilik yaratsa da qeyri-OPEC ölkələri bazara artıq həcmdə neft çıxardılar və qiymət artımı müşahidə edilmədi. OPEC-in bazara 337 min barel əlavə neft çıxarmaq qərarı bu dövlətlər üçün məcburi deyil. Onu da nəzərə almaq lazımdır ki, dünya bazarında qiyməti formalaşdıran əsas OPEC kartelidir.
Analitiklər hesab edirlər ki, Venesuela Rusiyanı dəstəklədiyi üçün ABŞ bu ölkəyə qarşı mütləq hərbi əməliyyatlar keçirəcək. Lakin hələlik ABŞ ilə Rusiya arasında danışıqlar davam edir ki, bu da qlobal neft bazarının gözləmə mövqeyinə keçməyə vadar edib. Bazar tələb və təklifin hərəkətə keçməsini izləyir.
Digər tərəfdən Qazaxıstanın energetika naziri Yerlan Akkenjenov bildirib ki, SOCAR ilə aparılan danışıqların nəticəsində Qazaxıstan 2026-cı ildə Bakı-Tbilisi-Ceyhan neft kəməri ilə dünya bazarına 2,2, 2027-ci ildə kimi isə 7 milyon ton neft ixrac etməyi planlaşdırıb.
Bununla yanaşı ötən həftə Çinin Milli Dəniz Neft Şirkəti (CNOOC) Cənubi Çin dənizində aparılan kəşfiyyat işlərinin nəticə verdiyini və “Hijian” yatağından 2026-cı ildən başlayaraq sutkada 18 min barel neft hasil edəcəyini bəyan edib.
ABŞ-ın APİ neft institutunun hesabatında bildirib ki, dünyada xam neft ehtiyatı 2,391 milyon barel artıb. Yəni bu neft artıq hasil edilib, rezervuar və anbarlarda saxlanılır.
Bütün yuxarıda göstərilən faktlar 2026-cı ilin ilk rübündə neftin qiymətində enmə tendensiyasının davam edəcəyini deməyə əsas verir. Hazırda dünya bazarında “Brent” markalı neftin 1 barelinin qiyməti 61 dollar ətrafında satılır. Mütəxəssislər qeyd edirlər ki, yeni il tətilləri ilə əlaqədar olaraq qarşıdakı həftədə dünya bazarında neftin qiyməti dəyişməz olaraq qalacaq. Qiymətlərdə yuxarı və aşağıya doğru sıçrayış müşahidə edilməyəcək.
Bölmənin digər xəbərləri
