QAZAXISTAN HÖKUMƏTİ MÜASİR HƏBSXANALARIN TİKİNTİSİNƏ VƏSAİT AYIRIR

07.06.2004 [19:25]
Çap et
A⁺ A^-

AZƏRTAC-ın Astanadan aldığı xəbərə görə, Qazaxıstan hökuməti ölkənin islah-əmək müəssisələrinin saxlanılmasına büdcədən 9 milyard təngədən artıq (65 milyon dollardan bir qədər çox) vəsait ayırır. Ölkənin ədliyyə naziri Onalsın Jumabekov parlamentdə hökumət saatında bildirmişdir ki, bu vəsait yaxın üç il ərzində əlavə olaraq ayrılacaqdır.

Nazirin sözlərinə görə, vəsait azadlıqdan məhrum edilmiş Qazaxıstan vətəndaşlarının yeməyinin və saxlanılma şəraitinin yaxşılaşdırılmasına yönəldiləcəkdir. Onun çox hissəsi köhnə həbsxanaların təzədən qurulmasına və yeni həbsxanaların tikintisinə sərf ediləcəkdir. Jumabekov demişdir:”Qazaxıstanda məhbusları saxlamaq üçün beynəlxalq standartlara cavab verən həbsxana yoxdur”. Odur ki, Almatıda, Çimkənddə müasir islah müəssisələri tikmək nəzərdə tutulmuşdur. Bundan əlavə, Qazaxıstanda ölüm cəzasına moratorium qoyulduğundan və ömürlük həbs cəzası tətbiq edildiyindən Pavlodarda ömürlük həbs cəzasına məhkum olunmuş məhbuslar üçün həbsxana tikiləcəkdir.

Hazırda Qazaxıstan həbsxanalarında müxtəlif müddətlərə həbs cəzasına məhkum olunmuş 56 minə yaxın adam saxlanılır.