Astana, 13 may, AZƏRTAC

Azərbaycanın Qazaxıstandakı səfiri Rəşad Məmmədovun bu ölkənin müxtəlif vilayətlərinin azərbaycanlı icma rəhbərləri və üzvləri ilə görüşü keçirilib.

Qazaxıstan Xalq Assambleyasının üzvləri ilə ilk dəfə keçirilən görüşdə diplomat Azərbaycanda və dünyada baş verən proseslər, qarşıda duran vəzifələr, ümummilli problem olan Ermənistan-Azərbaycan, Dağlıq Qarabağ münaqişəsinin hazırkı vəziyyəti barədə danışıb.

Diplomat Azərbaycan dövlətinin formalaşdırılmış icma siyasəti, ölkəmizdə keçirilən beynəlxalq əhəmiyyətli tədbirlər barədə məlumat verib. O vurğulayıb ki, hazırda dünyada baş verən proseslər, ölkəmizin yerləşdiyi regionun özünəməxsusluğu, dünyadakı yeni çağırışlar və Prezident İlham Əliyevin tolerantlıq ənənələrinin dünyaya tanıdılmasına yönəlik xarici siyasəti ölkəmiz tərəfindən diasporla aparılan işlərə daha həssaslıqla yanaşılmasını şərtləndirir və ayrı-seçkiliyə yol verilmədən onların azərbaycançılıq ideyası ətrafında birləşməsi naminə səylərin daha da güclənməsini tələb edir.

Dünya Azərbaycanlılarının IV Qurultayı ərəfəsində bu görüşün vacibliyini qeyd edən səfir bildirib ki, ən çox soydaşımızın məskunlaşdığı ölkələrdən olan Qazaxıstanın müxtəlif vilayətlərində olan çoxsaylı diaspor təşkilatlarının daha mütəşəkkil şəkildə fəaliyyət göstərməsinə ciddi ehtiyac var. İcmanın vahid ideya ətrafında birləşməsi məqsədilə bu sahədə ciddi islahatlara başlanılmalı, nüfuzlu icma üzvləri arasında əsassız ayrı-seçkiliyə yol verilməməlidir.

Rəşad Məmmədov qeyd edib ki, Prezident İlham Əliyevin uğurlu siyasəti nəticəsində Azərbaycanın dünyada formalaşan müsbət imici və xalqımıza qarşı gündən-günə artan rəğbət Qazaxıstanda da açıq aydın müşahidə edilir. Artıq Qazaxıstanda yaşayan soydaşlarımız Qazaxıstan ictimaiyyətinin Azərbaycan dövlətinə və bu ölkədəki soydaşlarımıza qarşı münasibətinin daha da yaxşılaşmasını hiss edirlər. Bu da onların azərbaycanlı olmaları ilə fəxr etmələrinə, dövlətimizə bağlılığının daha da güclənməsinə və eyni zamanda, qazaxlarla daha yaxın əlaqələrin qrurulmasına imkan yaradır.

Səfir bir daha bildirib ki, müasir dövrün yeni çağırışlarını nəzərə alaraq, icma strukturlarının yenidən formalaşmasına mühüm əhəmiyyət verilməlidir.

Çıxış edən icma rəhbərləri diasporun fəaliyyətinin gücləndirilməsi istiqamətində təkliflərini verib, azərbaycançılıq ideyası ətrafında sıx birləşərək fəaliyyətlərinin birgə koordinasiyasının vacibliyini qeyd ediblər.

Səfir R.Məmmədov Azərbaycan dövləti üçün vacib və konkret məsələlərin həlli zamanı icma ilə səfirliyin fəaliyyətinin birgə koordinasıyası ilə bağlı məqamlara da diqqət yetirib.

Görüşdə bir daha vurğulanıb ki, Azərbaycan diasporu milli maraqlar çərçivəsində fəaliyyətini daha keyfiyyətli şəkildə bundan sonra da davam etdirməlidir.

İlahə Əhmədova

AZƏRTAC-ın xüsusi müxbiri

Astana