QƏBƏLƏDƏ GÜCLÜ LEYSAN VƏ DOLU CİDDİ ZİYAN VURMUŞDUR
Qəbələ, 17 may (AZƏRTAC). Mayın 15-16-da Qəbələ rayonunun Bunud, Həzrə kəndlərinə düşən dolu və leysan yağışları dağıntı və tələfata səbəb olmuşdur.
Rayon fövqəladə hallar komissiyasının üzvü Varis Yaqubov bildirmişdir ki, bu kəndlərdə 100-dən artıq həyətyanı sahəni sel basmış, evlərə, tövlələrə su dolmuşdur. Bir neçə ev qəzalı vəziyyətə düşmüşdür. Küçələri və həyətyanı sahələri, əkin yerlərini lil örtmüşdür. Sel suları 10 baş mal-qaranı, 22 baş davarı, 380 toyuq-cücəni tələf etmişdir. Dağlardan gələn sel kənd sakinlərinə məxsus “VAZ-21099” və “VAZ-21015” markalı minik avtomobillərini aşırmış, dayandığı yerdən 500 metr aralı apararaq dərəyə aşırmışdır. Hər iki avtomobil istismara tam yararsız hala düşmüşdür. Dolu meyvə ağaclarına və əkin sahələrinə də ciddi ziyan vurmuşdur. Ümumilikdə 6 hektar əkin sahəsi məhv olmuşdur. Küləklə müşayiət olunan leysan yağışları 10-a yaxın elektrik dirəyini aşırmış, 400 metrlik telefon və 500 metrlik işıq xətti qırılmışdır. Hər iki kəndin içməli su xətti sıradan çıxmış, bu kəndlərin arasındakı çaylağın üzərindəki avtomobil körpüsü dağılmışdır.
Mayın 16-da rayon icra hakimiyyətinin və Fövqəladə Hallar Nazirliyi şimal-qərb regional mərkəzinin rəhbər şəxsləri hadisə yerində olmuş, kəndlərə dəyən ziyanın aradan qaldırılması işlərinə başlanılmışdır. Həmin kəndlərə elektrik enerjisinin verilməsi bərpa olunmuşdur. Hazırda içməli su xəttinin, yolların və uçan körpünün bərpası istiqamətində işlər davam etdirilir, əhaliyə dəyən ziyanın məbləği hesablanır.
Bölmənin digər xəbərləri
