Qəbələdə sel suları təsərrüfatın ayrı-ayrı sahələrinə ziyan vurmuşdur
Qəbələ, 11 iyul (AZƏRTAC). Qəbələ rayonuna yağan güclü leysan yağışları nəticəsində yaranan sel suları küçələri, əkin sahələrini, evləri, həyətyanı sahələri basmışdır.
Rayon icra hakimiyyətindən AZƏRTAC-a bildirmişlər ki, iyulun 10-11-də Qəbələ şəhərinə və rayonun dağlıq ərazidə yerləşən Bunut, Nohurqışlaq, Laza, Duruca, Zarağan, Vəndam kəndlərinə güclü leysan yağmışdır. Yağışın əmələ gətirdiyi sel suları kənd yollarına ziyan vurmuş, Qəbələ şəhərinin 10-a yaxın küçəsində suyun hündürlüyü 30 santimetr olmuş, selin yaratdığı sular həyətyanı sahələrə, fərdi yaşayış evlərinin zirzəmilərinə dolmuşdur.
Rayon ərazisindən keçən Tikanlı-Qaraçay, Həmzəliçay, Türyançay, Dəmiraparançay, Bumçay, Mirzəbəyliçay, Vəndamçay çaylarında suyun səviyyəsi iki metrədək qalxmış, sel bəzi ərazilərdə çaysahili mühafizə bəndlərini dağıtmışdır. Dağlardan gələn sel suları Bunud kəndindən keçən Bunudçayın və Daşlıca kəndindən keçən Pirəlliçayın üzərindəki 3 avtomobil körpüsünü, eləcə də Zarağan kəndində və Qəbələ şəhərindən keçən Qaraçay çayının üzərindəki 3 su keçidini dağıtmışdır.
Hazırda rayon fövqəladə hallar komissiyasının nümayəndələri yerlərdə vətəndaşların müraciətlərinə baxır, təsərrüfatın ayrı-ayrı sahələrinə dəymiş ziyanın nəticələrinin aradan qaldırılması üçün tədbirlər görülür.
Bölmənin digər xəbərləri
