Qərbi Azərbaycan İcmasının Qubada yeni ofisi açılıb
Bakı, 30 noyabr, AZƏRTAC
Noyabrın 30-da Qərbi Azərbaycan İcmasının rəhbər şəxsləri və nümayəndə heyəti Quba rayonuna olublar. Səfər Qərbi Azərbaycan İcmasının Quba rayon üzrə nümayəndəliyinin yeni ofisinin açılışı çərçivəsində baş tutub. Səfərdə Qərbi Azərbaycan İcmasının İdarə Heyətinin sədri, Milli Məclisin deputatı Əziz Ələkbərli, deputatlar Hikmət Babaoğlu, Məlahət İbrahimqızı, Əlibala Məhərrəmzadə, Müşviq Məmmədli, Şahin İsmayılov, Günay Ağamalı, İdarə Heyətinin üzvü professor Mahirə Hüseynova, Nəzarət-Təftiş Komissiyasının sədri professor Vahid Novruzov, Hüquq Komissiyasının sədri Zahid Cəfərov, eləcə də digər nümayəndələr və tanınmış elm xadimləri iştirak ediblər.
İcmadan AZƏRTAC-a bildirilib ki, əvvəlcə qonaqlar Quba şəhərindəki Heydər Əliyev adına Mədəniyyət və İstirahət parkında Ulu Öndər Heydər Əliyevin abidəsini ziyarət edərək önünə gül dəstələri qoyublar.
“Tarixi yaddaşımızı qoruyaq!” – Qubada Qərbi Azərbaycana qayıdış mesajı
Quba nümayəndəliyinin açılış mərasimi çərçivəsində Qərbi Azərbaycan mövzusuna dair sənədlər, kitablar və xəritələrin yer aldığı mərkəz iştirakçılara təqdim olunub. Daha sonra rayon və icma rəhbərliyi, həmçinin elm xadimlərinin iştirakı ilə iclas keçirilib.
Quba Rayon İcra Hakimiyyətinin başçısı İlqar Mahmudov çıxışında bildirib ki, Azərbaycanın böyük Zəfərindən sonra regionda yeni reallıqlar yaranıb və bu gün Qərbi Azərbaycan mövzusu ümiddən daha çox əminliyə çevrilib. Onun sözlərinə görə, Qubada istifadəyə verilən bu mərkəz İcmanın fəaliyyətində mühüm rol oynayacaq.
Qərbi Azərbaycan İcmasının İdarə Heyətinin sədri, Milli Məclisin deputatı Əziz Ələkbərli vurğulayıb ki, Qubada nümayəndəliyin açılması, indiki Ermənistan ərazisindən azərbaycanlıların deportasiya olunduğu günlərə təsadüf etməsi baxımından xüsusi məna kəsb edir. O qeyd edib ki, Quba ictimaiyyəti bu məsələyə həssas yanaşmaqla Qərbi Azərbaycan mövzusunun ümummilli xarakter aldığını bir daha göstərib.
“Soydaşlarımızın təhlükəsiz, ləyaqətli və beynəlxalq hüquq çərçivəsində öz doğma yurdlarına qayıtması Azərbaycan dövlətinin prioritetidir. Qubada yeni ofisin açılması bu işin regional səviyyədə daha səmərəli təşkilinə xidmət edəcək,” – deyə Əziz Ələkbərli bildirib.
Digər çıxışçılar da qeyd ediblər ki, Qərbi Azərbaycan İcmasının fəaliyyəti artıq ölkənin bütün bölgələrini əhatə edir. Yeni ofislərin açılması Qayıdış prosesinin möhkəmlənməsinə, ictimai həmrəyliyin genişlənməsinə mühüm töhfə verir.
Quba nümayəndəliyinin yeni ofisi bölgədə yaşayan Qərbi Azərbaycan əsilli soydaşların təşkilatlanması, mədəni irsin qorunması, deportasiya faktlarının toplanması, gənclərin maarifləndirilməsi və Qayıdış Konsepsiyasının yerli səviyyədə icrası üçün geniş imkanlar yaradacaq.
Bölmənin digər xəbərləri
