Qırğız Respublikasında IV Türk Dövlətləri Aqrobiznes Forumu keçirilib
Bakı, 26 iyun, AZƏRTAC
Qırğız Respublikasının Çolpon-Ata şəhərində IV Türk Dövlətləri Aqrobiznes Forumu keçirilib. Tədbir Türk Dövlətləri Təşkilatının (TDT) Kənd Təsərrüfatı Nazirlərinin IV Toplantısı çərçivəsində təşkil olunub. Forumda təşkilata üzv dövlətlərin və müşahidəçi ölkələrin hökumət üzvləri, dövlət qurumlarının və aqrar sahə üzrə ixtisaslaşmış şirkətlərinin nümayəndələri iştirak ediblər.
Kənd Təsərrüfatı Nazirliyindən AZƏRTAC-a bildirilib ki, iclası açan Qırğız Respublikası Baş nazirinin müavini, su ehtiyatları, kənd təsərrüfatı və emal sənayesi naziri Bakıt Torobaev ərzaq təhlükəsizliyinin təmin edilməsində, torpaq, su ehtiyatlarının və biomüxtəlifliyin qorunmasında, eləcə də iqlim dəyişikliyinə uyğunlaşmada kənd təsərrüfatının mühüm rol oynadığını qeyd edib. O, TDT ölkələri arasında aqrar sahədə ticarət dövriyyəsinin artırılması üçün böyük potensialın olduğunu vurğulayıb.
Tədbirdə çıxış edən kənd təsərrüfatı naziri Məcnun Məmmədov Azərbaycanda aqrar sahədə aparılan islahatlar və gələcək hədəflər barədə tədbir iştirakçılarına məlumat verib. Ölkəmizdə aqrar sahənin torpaq vergisi istisna olmaqla, bütün vergilərdən azad olduğunu diqqətə çatdıran nazir qeyd edib ki, Azərbaycanda kənd təsərrüfatının inkişafı məqsədilə subsidiya, kredit və güzəşt formasında güclü dövlət dəstəyi mexanizmləri mövcuddur. Forum iştirakçılarının diqqətinə çatdırılıb ki, nəhəng transmilli nəqliyyat layihələrin icrası ilə Azərbaycan Avrasiya regionunda mühüm tranzit və logistika mərkəzinə çevrilib.
Nazir Məcnun Məmmədov vurğulayıb ki, TDT ölkələrinin biznes subyektləri infrastruktur layihələrindən və əlverişli investisiya mühitindən yararlanaraq ixrac coğrafiyasını daha da genişləndirməlidirlər: “Bizim əsas məqsədimiz dövlət-özəl tərəfdaşlıq prinsipi vasitəsilə ölkələrimizin iqtisadi gücünü daim artırmaq və ərzaq təhlükəsizliyini təmin etməkdir”.
Forumda Özbəkistanın kənd təsərrüfatı nazirinin müavini Kaxramon Yuldaşev, TDT Baş katibinin müavini Merey Mukazhan, Türk Ticarət və Sənaye Palataları Birliyinin baş katibi Adem Kula çıxış edərək, təşkilata üzv ölkələrin kənd təsərrüfatı sahəsində mövcud vəziyyəti və aqrar potensialı barədə məlumat veriblər. Tədbirdə çıxış edən natiqlər bu tədbirin üzv dövlətlər arasında aqrar sahədə əməkdaşlığın yeni istiqamətlərinin formalaşmasına, yeni investisiya imkanlarının təşviqinə və iş adamları arasında əlaqələrin güclənməsinə xidmət edəcəyini vurğulayıblar.
IV Türk Dövlətləri Aqrobiznes Forumu panel sessiyalarla işini davam etdirib. Panel sessiyalarda iştirak edən dövlət və biznes subyektlərinin nümayəndələri TDT ölkələrinin iqtisadi, aqrar potensialı, investisiya imkanları, həyata keçirilən islahatlar və mövcud nəqliyyat infrastruktur layihələri barədə tədbir iştirakçılarına ətraflı məluat veriblər.
“Kənd təsərrüfatı məhsullarının istehsalı və ticarəti: maneələrdən biznesə” mövzusuna həsr olunan panel sessiyada kənd təsərrüfatı məhsullarının istehsalı, ixracı və innovativ yanaşmalar sahəsində əməkdaşlıq imkanları müzakirə edilib. “Heyvandarlığın inkişafı və genetik irsin qorunması” mövzunda keçirilən panel sessiyada isə kənd təsərrüfatı biotexnologiyası, nadir heyvan cinslərinin seleksiyası və mühafizəsi üzrə mütəxəssislərin məruzələri dinlənilib. Forum iştirakçıları Türk dünyasında su idarəçiliyi, su resurslarından səmərəli istifadənin kənd təsərrüfatı üçün əhəmiyyəti mövzularını da müzakirə ediblər.
Daha sonra IV Türk Dövlətləri Aqrobiznes Forumu çərçivəsində Türk Dövlətləri Təşkilatına üzv ölkələrin aqrar sahə üzrə ixtisaslaşmış şirkətlərinin nümayəndələri arasında ikitrəfli görüşlər keçirilib.
Bölmənin digər xəbərləri
