Qırğızıstan Prezidenti Bişkek şəhərində ikinci dəfə fövqəladə vəziyyət elan edib
Bişkek, 12 oktyabr, АZƏRTAC
Qırğızıstan Prezidenti Sooronbay Jeenbekov Bişkekdə ictimai-siyasi vəziyyətin sabitləşməsi, asayişin bərpası üçün ikinci dəfə fövqəladə vəziyyət elan edib.
AZƏRTAC xəbər verir ki, fövqəladə vəziyyət rejimi oktyabrın 12-si saat 20:00-dən oktyabrın 19-u saat 07:00-dək qüvvədə olacaq. Bu dövrdə Qırğızıstan Daxili İşlər nazirinin müavini Almazbek Orazaliyev Bişkek şəhərinin komendantı təyin edilib.
Dövlət başçısı digər fərmanla fövqəladə vəziyyət rejiminin əsasnaməsini də təsdiq edib.
Xatırladaq ki, oktyabrın 4-də Qırğızıstan parlamentinə - Joqorku Keneşə keçirilən seçkilərin nəticələri ilə barışmayan siyasi partiyaların rəhbərləri və üzvləri bir həftədir Bişkekin mərkəzindəki Ala-Too meydanında kütləvi mitinqlər təşkil edirlər. Etirazçıların tələbi ilə yeni seçilmiş parlament buraxılıb.
Bu hadisələr fonunda parlamentin sədri Dastanbek Cumabekov istefa verib. Qırğızıstan Prezidenti Sooronbay Jeenbekov Baş Nazirin səlahiyyətlərini icra edən Kubatbek Boronov başda olmaqla, hökumətin bütün üzvlərini istefaya göndərib və Sadır Japarov ölkənin yeni Baş Naziri seçilib.
Qırğızıstanda siyasi gərginlik davam edir.
Qulu Kəngərli
AZƏRTAC-ın xüsusi müxbiri
Bişkek
Bölmənin digər xəbərləri
