CƏMİYYƏT
Qoruqda narkotik xassəli çətənə bitkisi olduğu güman edilən 753 ədəd kol aşkarlanıb
Bakı, 30 iyul, AZƏRTAC
Ekologiya və Təbii Sərvətlər Nazirliyinin Zaqatala Dövlət Təbiət Qoruğunun “Narkotiklərlə mübarizəyə dair illik Tədbirlər Planı”na müvafiq olaraq yerli hüquq mühafizə orqanlarının nümayəndələrini və onların xüsusi texnikasını cəlb etməklə qoruğun ərazisində reyd keçirilib.
Nazirliyin mətbuat xidmətindən AZƏRTAC-a verilən məlumata görə, reyd zamanı xüsusi texnikanın - helikopter və çəkiliş aparan paraplanların köməyi ilə qoruğun Gərəkli sahəsinin mürəkkəb relyefli, uçqun meyilli ərazisində narkotik xassəli çətənə bitkisi olduğu güman edilən 753 ədəd kol aşkarlanıb. Aşkar edilən kollar hüquq mühafizə orqanlarına təhvil verilib.
Hazırda qoruğun ərazisində narkotik vasitələrin qanunsuz dövriyyəsinə qarşı mübarizə tədbirləri çərçivəsində narkotik xassəli bitkilərin qanunsuz əkildiyi və yabanı halda bitdiyi yerlərin müəyyən edilməsi istiqamətində əməliyyat axtarış tədbirləri davam etdirilir.