Rahid Əmirquliyev: “Qarabağ” cütün favoritidir, “Sabah” – “Neftçi” matçında isə şanslar bərabərdir
Bakı, 22 aprel, AZƏRTAC
“Kubok oyunları çempionat matçlarından seçilir. Komandalar oyun sayı az olduğuna görə kuboka fərqli yanaşırlar. Eyni zamanda bu turnir avrokuboklara vəsiqə qazanmaq üçün ən rahat yoldur. Bütün yarımfinalçılara indidən uğurlar arzulayıram”.
Bu sözləri AZƏRTAC-a açıqlamasında Azərbaycan millisinin sabiq futbolçusu Rahid Əmirquliyev ölkə kubokunun 1/2 final mərhələsinin cavab oyunlarında komandaların şanslarını dəyərləndirərkən deyib.
36 yaşlı yarımmüdafiəçi “Qarabağ” – “Araz-Naxçıvan” (ilk oyun 0:1) matçında Ağdam təmsilçisini favorit hesab etdiyini bildirib: “Naxçıvan klubu ilk görüşdə çox yaxşı çıxış etməsinə baxmayaraq, “Qarabağ”ın şanslarını daha yüksək qiymətləndirirəm. İlk qarşılaşmanı izləmişdim. Sözsüz ki, bizi yenə baxımlı oyun gözləyir. Qurban Qurbanovun kollektivi bu dəfə öz meydanında oynayacaq. Düşünürəm ki, bu, onlar üçün üstünlükdür. Əslində, tərəf tutmağı düzgün hesab etmirəm. Güclü olanın qalib gəlməsini istəyirəm”.
O, “Sabah” – “Neftçi” (ilk oyun 2:1) qarşılaşmasında isə şansların bərabər olduğunu söyləyib: “Komandalar arasında ilk oyun çox maraqlı keçmişdi. “Sabah”ın ilk matçda qələbə qazanması o demək deyil ki, “Neftçi”nin şansı yoxdur. 2:1 hesabı hələ heç nə demək deyil. Fikrimcə, bu görüş hər an sürprizlə nəticələnə bilər”.
Qeyd edək ki, hər iki qarşılaşma aprelin 23-də keçiriləcək.
Bölmənin digər xəbərləri
