Riqada Novruz bayramı qeyd edilmişdir
Riqa, 22 mart (AZƏRTAC). Riqada Azərbaycan diasporu Novruz bayramı münasibətilə şənlik təşkil etmişdir. Tədbirdə Azərbaycan diasporunun, Latviya ictimaiyyətinin nümayəndələri, Azərbaycanın Riqadakı səfirliyinin əməkdaşları, bu ölkədə təhsil alan azərbaycanlı tələbələr iştirak etmişlər.
“Azəri” Cəmiyyətinin sədri Ulduzxan Əhmədov həmvətənləri bayram münasibətilə təbrik edərək demişdir ki, xalqımızın ən sevimli bayramlarından biri olan Novruz yazın gəlişinin, təbiətin yenilənməsinin, oyanışının rəmzidir.
Latviyadakı Azərbaycan səfirliyinin nümayəndəsi şənliyə qatılanları Novruz bayramı münasibətilə təbrik edərək demişdir ki, kökləri lap qədimlərə gedib çıxan bu bayram UNESCO-nun Qeyri-maddi mədəni irsinin Reprezentativ Siyahısına daxil edilmişdir. O, Azərbaycan xalqına növbəti Novruz bayramını doğma Qarabağda qeyd etməyi arzulamışdır.
Latviyadakı Azərbaycan icmasının ağsaqqalı Adıgözəl Məmmədov tədbir iştirakçılarını Novruz bayramı münasibətilə təbrik edərək hamıya sülh və əmin-amanlıq arzulamışdır.
Latviyada təhsil alan azərbaycanlı tələbələr Novruzun tarixindən söz açmış, ona həsr olunmuş şeirlər oxumuşlar.
Bayram tədbirində Azərbaycan mahnıları səslənmiş, milli rəqslər ifa edilmişdir.
Nigar Hüseynova
AZƏRTAC -ın xüsusi müxbiri
Riqa
Bölmənin digər xəbərləri
