Sahibsizlikdən sahiblik mərhələsinə - Ağdamda dirçələn torpaq, dirilən xalq ŞƏRH
Bakı, 13 may, AZƏRTAC
Prezident İlham Əliyevin 2025-ci il mayın 10-da Ağdama səfəri Azərbaycanın postmüharibə mərhələsində həyata keçirdiyi milli dirçəliş strategiyasının real nəticələrini nümayiş etdirən önəmli siyasi hadisə idi. Bu səfər təkcə azad edilmiş ərazilərdə infrastrukturun qurulması deyil, həm də ictimai yaddaşın, milli kimliyin və dövlət suverenliyinin həmin torpaqlarda fiziki olaraq bərpa edildiyini göstərdi. 2020-ci ildə qazanılmış Zəfər ərazi bütövlüyünü təmin etdiyi kimi, bu gün həmin torpaqlarda qurulan həyat - sabitlik, rifah və etimad Azərbaycanın siyasi iradəsinin davamlı və uğurlu tətbiqini ortaya qoyur. Ağdam artıq yalnız simvolik məkan deyil, dövlət siyasətinin canlı və ölçülə bilən nəticəsidir.
Bu fikirləri AZƏRTAC-a açıqlamasında Beynəlxalq Avrasiya Mətbuat Fondunun vitse-prezidenti Oğuz Mirzəyev söyləyib.
O bildirib ki, Kəngərli kəndində 292 ailə üçün inşa edilən yeni evlər, Ağdam dəmir yolu vağzalının istifadəyə verilməsi və Muğam Mərkəzinin açılmasının Qarabağda həyata keçirilən işlərin vahid konsepsiya ilə – planlı, mərhələli və məqsədyönlü şəkildə aparıldığını göstərir. Burada yalnız yaşayış sahələri bərpa edilmir, həm də iqtisadi dinamika, sosial həyat və mədəni kimlik sistemli şəkildə dirçəldilir: “Dövlət bu prosesi təkcə inşaat kimi deyil, strateji inkişaf mərhələsi kimi görür və idarə edir. Bu baxımdan Kəngərli kəndində həyata keçirilən məskunlaşma prosesi həm də beynəlxalq miqyasda nadir təcrübədir. Müharibədən cəmi bir neçə il sonra Azərbaycan minatəmizləməni tamamlamaqla, təhlükəsiz və planlı şəkildə köçürməni reallaşdırmaqla özünün institutlaşmış idarəetmə modelini sübut edir. Bu isə Prezident İlham Əliyevin “Biz bu torpaqlara əbədi qayıdırıq” fikrinin rəsmi bəyanatdan real həyata keçididir.
Səfərin mayın 10-na - Ulu Öndər Heydər Əliyevin doğum gününə təsadüf etməsi isə bu hadisəyə həm siyasi, həm də mənəvi çalar əlavə edib. Bu tarix Prezident İlham Əliyevin apardığı siyasətin yalnız fərdi liderlik yox, ideoloji davamlılıq üzərində qurulduğunu nümayiş etdirdi. Həmin gün yalnız Ulu Öndərin xatirəsi yad edilmədi, həmin siyasi irsin azad Qarabağda konkret nəticəyə çevrildiyi də göstərildi”.
Səfər zamanı Prezidentin ictimaiyyət nümayəndələri ilə səmimi təmasının xüsusi diqqət çəkdiyini vurğulayan ekspert əlavə edib: “Birinci Qarabağ müharibəsi əlilinin “Bizim yiyəmiz olmadı o vaxt... siz bizə sahib çıxdınız” sözləri təkcə minnətdarlıq ifadəsi deyildi, bu, dövlətin öz insanına vaxtında və layiqincə sahib çıxmasının simvolik təsdiqi idi.
Ağdam Muğam Mərkəzində səslənən ifalar, azyaşlı sənətçilərin çıxışları zamanı Prezidentin kövrəlməsi və səhnəyə qalxaraq onları qucaqlaması – bu səhnə rəsmi protokoldan çox, xalqla dövlətin mənəvi birliyini ifadə edən mənzərə idi. Bu anlar göstərdi ki, Qarabağ təkcə ərazi deyil, xalqın hafizəsidir, acılarla dolu keçmişin və ümidlə yüklənmiş gələcəyin qovuşduğu məkandır”.
Beynəlxalq Avrasiya Mətbuat Fondunun vitse-prezidentinin fikrincə, Prezidentin Ağdamda həyata keçirdiyi tədbirlər onu da göstərdi ki, bu şəhər təkcə işğaldan azad edilmiş ərazi deyil, gələcəyin regional inkişaf modelidir. Dəmir yolu vağzalı iqtisadi əlaqələrin canlanmasına, Muğam Mərkəzi isə mədəni ruhun yenidən doğulmasına xidmət edir. Ağdam yalnız keçmişin deyil, sabahın şəhərinə çevrilir.
“Bu səfər, eyni zamanda, Azərbaycan dövlətinin beynəlxalq səviyyədə formalaşdırdığı etibarlı mövqeyin də güzgüsünə çevrildi. Prezident İlham Əliyevin apardığı xarici siyasət nəticəsində Azərbaycan bu gün təkcə regionda deyil, qlobal səviyyədə də strateji güc mərkəzi kimi tanınır. Bakı beynəlxalq enerji və nəqliyyat dəhlizlərinin kəsişmə nöqtəsinə çevrilib, ölkəmiz Avropanın enerji təhlükəsizliyində həlledici rol oynayır. Azərbaycan öz milli maraqlarını müdafiə etməklə yanaşı, beynəlxalq hüququn prinsiplərinə əsaslanan sabitlik və əməkdaşlıq platforması formalaşdırır.
Prezidentin səfər zamanı səsləndirdiyi “Bizimlə hesablaşmayan sabah peşman olur” fikri isə Azərbaycanın siyasi xəttinin açıq bəyanatını təşkil edir. Bu, nə hədə, nə ritorikadır, bu, reallıqdır. Azərbaycan öz tarixini özü yazır və bu tarix bir daha sübut edir ki, müharibədə qələbə qazanmaq çətin ola bilər, amma qələbədən sonra ədalətli sabitlik qurmaq daha çətindir və Azərbaycan bunu bacaran nadir ölkələrdəndir”, - deyə O.Mirzəyev qeyd edib.
Bölmənin digər xəbərləri
