Salyan rayonunda fəaliyyət göstərən “Ana Kür” İctimai Birliyi regionda ekoloji layihənin icrasına başlamışdır
Salyan, 14 aprel (AZƏRTAC). Ölkəmizdə ekoloji problemlərin həll edilməsində müsbət təcrübə toplanmışdır. Bu sahədə qazanılmış uğurlar beynəlxalq ictimaiyyət tərəfindən də qiymətləndirilir.
AZƏRTAC xəbər verir ki, ətraf mühitin mühafizəsi üzrə son on ilin nəticələrinə görə respublikamız ikinci yerdədir. Bu, Azərbaycanda ekoloji problemlərin daha sürətlə həll olunduğunu gostərir.
Bu işdə dövlət orqanları ilə yanaşı qeyri-hökumət təşkilatları, ictimaiyyətin nümayəndələri, yerli icmalar yaxından iştirak edirlər, iri şəhərlərlə yanaşı regionlarda da uğurlu layihələr həyata keçirilir.
Salyan rayonunda fəaliyyət göstərən “Ana Kür” ekoloji problemlərin öyrənilməsinə kömək İctimai Birliyinin könüllüləri “Ətraf mühitin mühafizəsi və sağlamlığın qorunması istiqamətində Salyan rayonunun gənclərinin təşəbbüslərinin dəstəklənməsi” layihəsi üzrə Azərbaycan Respublikasi Prezidenti yanında Qeyri-Hökumət Təşkilatlarına Dövlət Dəstəyi Şurasından maliyyə yardımı almışdır.
Yeni layihənin icrası ilə əlaqədar Salyan şəhərində təqdimat mərasimi keçirilmişdir.
Yerli icra və bələdiyyə orqanlarının, təhsil, səhiyyə, mədəniyyət işçilərinin, Ekologiya və Təbii Sərvətlər Nazirliyi 3 saylı regional şöbəsinin əməkdaşlarının, QHT sektorunun və KİV nümayəndələrinin iştirakı ilə keçirilən tədbirdə rayon təhsil şöbəsinin müdiri Əbülfət Bədəlov, rayon ağsaqqallar şurasının sədri hacı Beydulla İmanov, Təhsil İşçiləri Azad Həmkarlar İttifaqı Salyan rayon komitəsinin sədri Yaqut Ələskərova, şəhər 2 nömrəli orta məktəbin direktoru Firudin Həsənov, Salyan Rayon İcra Hakimiyyəti başçısı aparatının siyasi partiyalar və ictimai təşkilatlarla iş şöbəsinin müdiri Kərəm Muradov və başqaları çıxış edərək layihə çərçivəsində görüləcək işlərdən, həyata keçiriləcək tədbirlərdən danışmışlar.
Mənbəyini Türkiyənin Ərzurum dağlarından götürən Kür çayı Qazax rayonundan respublika ərazisinə daxil olduqdan sonra ən çox -66 kilometr məsafədə Salyan rayonunun ərazisindən axaraq Xəzər dənizinə tökülür.
Təəssüf ki, bir çox yerlərdə olduğu kimi, burada da çayın sahilləri təmiz saxlanılmır, ətraf məişət və sənaye tullantıları ilə zibillənir. Ərazidə biomüxtəliflik getdikcə daha çox təhlükəyə məruz qalır.
“Ana Kür” İctimai Birliyi ekoloji maarifləndirmə sahəsində yaxşı təcrübəsi olan mütəxəssisləri, pedaqoqları layihə çərçivəsində bir araya gətirməklə faydalı iş görür.
Layihənin nəzərdə tutulan icra planına uyğun olaraq Salyanın Kür çayı sahilində yerləşən məktəbləri, şagirdlər haqqında ətraflı məlumatlar toplanmış, məktəblilər və əhali arasında fəal könüllülər seçilmiş, təhsil ocaqlarinda və ictimaiyyət arasında dialoq-seminarların, digər maarifləndirici tədbirlərin keçirilməsinə başlanmışdır.
İcra müddəti üç ay olan layihənin həyata keçiriləcəyi müddətdə müxtəlif bədii tədbirlər, rəsm müsabiqələri də reallaşdırılacaqdır.
İctimaiyyətin fəal üzvləri arasından sahənin incəliklərinə bələd olan mütəxəssislərdən ibarət yaradılmış ekoloji klubun üzvləri layihənin monitorinqində iştirak edirlər.
Birliyin könüllülərinin təşəbbüsü və vəsaiti hesabına Salyan rayonunda ətraf mühitin mühafizəsi və sağlamlığın qorunmasına həsr olunmuş videoçarx hazırlanır.
Bölmənin digər xəbərləri
