ŞANXAY ƏMƏKDAŞLIQ TƏŞKİLATI DÖVLƏT BAŞÇILARI ŞURASININ DAŞKƏND GÖRÜŞÜ BAŞA ÇATMIŞDIR

18.06.2004 [17:31]
Çap et
A⁺ A^-

Daşkənddə Şanxay Əməkdaşlıq Təşkilatı Dövlət Başçıları Şurasının zirvə görüşü başa çatmışdır. Görüşdə Özbəkistan, Rusiya, Çin Xalq Respublikası, Qazaxıstan, Qırğızıstan, Tacikistanın dövlət başçılarının rəhbərliyi ilə nümayəndə heyətləri iştirak etmişlər. Əfqanıstan prezidenti Həmid Kərzai və Monqolustan prezidentinin xüsusi nümayəndəsi Luvsanqiyı Erdeneçuluun qonaq statusu ilə sammit iştirakçıları arasında olmuşlar.

Dövlət başçıları terrorizm, ekstremizm, separatizm, narkotiklərin və silahların qanunsuz dövriyyəsi, təhlükəsizlik, iqtisadi əlaqələrin genişləndirilməsi, o cümlədən Mərkəzi Asiyada ümumi bazarın formalaşdırılması məsələlərini müzakirə etmişlər.

Sammitin yekunları ilə bağlı Daşkənd Bəyannaməsi qəbul edilmiş, təşkilatın fəaliyyəti, iş prinsipləri, dövlətlər arasında bütün sahələrdə əlaqələrin tənzimlənməsi, terrorizm, ekstremizm, separatizm və s. məsələlərlə bağlı on sənəd imzalanmışdır.

Görüşdə Monqolustanın müraciəti nəzərə alınmış, təşkilatda bu dövlətə müşahidəçi statusu verilmişdir.

Şanxay Əməkdaşlıq Təşkilatında sədrlik Özbəkistandan Qazaxıstana keçmişdir.

Şuranın növbəti görüşü 2005-ci ildə Astanada keçiriləcəkdir.

Liderlər sammit çərçivəsində Daşkənddə ŞƏT-in Regional Antiterror Qurumu İcraiyyə Komutəsinin mənzil-qərargahının açılışında da iştirak etmişlər.