“Scopus” bazasında indeksləşən jurnalların reytinqində Azərbaycan elmi nəşrlərinin yeri
Bakı, 4 iyul, AZƏRTAC
“Scopus” bazasında indeksləşən elmi jurnalların reytinq cədvəlində (Scimago Journal Rank - SJR) Azərbaycanın elmi jurnallarının bəzi göstəriciləri yer alıb.
Bu barədə AZƏRTAC-a AMEA-dan məlumat verilib.
Beynəlxalq reytinq portalı olan “SCİmago Journal & Country Rank” dünyanın 391 tədqiqat mərkəzi, ən böyük elmi informasiya provayderi olan “Elsevier” nəşriyyatı və “Scopus” bazası ilə tərəfdaşlıq edərək hər ilin yekunlarına görə 16 indikator əsasında dünya ölkələrinin müxtəlif sahələrdə elmi məhsuldarlıq, elmyönümlü qurumların (universitetlərin, institutların, milli və özəl laboratoriyaların), eləcə də elmi jurnalların reytinqini müəyyən edir. “Scimago” mərkəzinin fəaliyyəti geniş, çoxşaxəli və həcmcə çox böyük olduğundan 2022-ci ilin yekunları haqqında hesabat 2023-cü ilin aprel-may aylarında dərc edilib.
Azərbaycanda nəşr olunan 13 jurnaldan 5-i riyaziyyat, 4-ü kimya, qalan 4-ü isə Yer elmləri, tibb, farmakologiya və humanitar sahələrə aiddir. 13 jurnaldan 6-sı, o cümlədən 3-ü riyaziyyat, 2-i kimya və 1-i Yer elmləri sahəsinə aid olmaqla AMEA-dan Elm və Təhsil Nazirliyinin tabeliyinə verilən Riyaziyyat və Mexanika, Kataliz və Qeyri-üzvi Kimya, Geologiya və Geofizika institutlarında, 3-ü Bakı Dövlət Universitetində (onlardan 2-i “Jomard” nəşriyyatında), 2-si Azərbaycan Tibb Universitetində, 1-i SOCAR Neft Qaz Elmi Tədqiqat Layihə İnstitutunda, 1-i isə “Jomard” nəşriyyatında incəsənət və humanitar sahədə müstəqil jurnal kimi çap olunur.
2020-ci ildə “Scopus” bazasına Azərbaycandan cəmi 10 elmi jurnal daxil olduğu halda. 2022-ci ildə onların sayı 13-ə çatıb (o cümlədən, kimya sahəsində 2-dən 4-ə). Onu da nəzərə almaq lazımdır ki, SJR reytinq cədvəli hər il dəyişdiyindən standartlara cavab verməyən jurnallar müəyyən vaxtdan sonra siyahıdan çıxarılır.
Azərbaycanda kimya sahəsində nəşr edilən 4 jurnaldan biri - “SOCAR Proceedings” jurnalı 2010-cu ildən “Scopus” bazasına daxildir. Bu jurnalda kimya və kimya texnologiyası ilə yanaşı, tətbiqi riyaziyyat, geologiya, geofizika, yanacaq və energetika sahəsində məqalələr də yer alır. Digər 3 jurnalda (onlardan biri Bakı Dövlət Universitetində, ikisi isə Kataliz və Qeyri-üzvi Kimya İnstitutunda nəşr olunur) yalnız kimya elminin müxtəlif sahələri üzrə məqalələr çap edilir.
Bölmənin digər xəbərləri
