Səfir: Azərbaycanın Vətən müharibəsindəki Zəfəri bütün türk dünyasının qələbəsidir
Tbilisi, 12 noyabr, AZƏRTAC
İkinci Qarabağ savaşını öz biləyinin gücü ilə qazanmış Azərbaycan indi də bölgəmizə sülh və sabitlik gəlməsi üçün, buranın inkişafı üçün sülhü də qazanmaq yoluna əmin addımlarla irəliləyir.
Bu sözləri AZƏRTAC-a müsahibəsində Türkiyənin Gürcüstandakı səfiri Ali Kaan Orbay söyləyib.
Onun sözlərinə görə, Azərbaycan öz torpaqlarına qovuşub, daha önəmlisi isə budur ki, torpaqlar həqiqi sahibinə qovuşub.
Bundan sonrakı proseslərdə də Türkiyə Azərbaycanın yanında olacaq.
Zəfər Günü münasibətilə Azərbaycan xalqını təbrik edən Ali Kaan Orbay Vətən müharibəsində Azərbaycanın qələbəsinin bütün türk dünyasının qələbəsi olduğunu vurğulayıb.
O deyib: “Azərbaycanın 8 Noyabr - Zəfər Gününü təbrik edirəm. Bu zəfəri bizlərə, sizlərə, bütün türk dünyasına ərməğan edən şəhidlərimizi rəhmət və hörmətlə yad edirəm. Bütün qazilərimizə buradan şəfalar və uzun ömür diləyirəm”.
Türkiyənin Azərbaycana dəstəyi tarixdən gələn qardaş köməyidir, Azərbaycan da çətin günündə Türkiyənin yanında yer alıb. Türkiyə bundan sonrakı proseseslərdə də Azərbaycanın yanında yer alacaq. Bu bir qardaş köməyidir. Türkiyə də təbii olaraq, çətin günündə Azərbaycanın yanında yer alacaq. Bu, “bir millət, iki dövlət” anlayışının da bir gərəyidir.
“Biz türklər, Azərbaycan və Türkiyə hər zaman sülhün tərəfində olmuşuq. Biz hər zaman tariximizi qələmlə, mürəkkəblə yazmaq istəmişik. Tarixin bəzi səhifələrinin qızıl hərflərlə yazılması gərəkdir. Bu səhifə də qızıl hərflərlə yazılıb, zəfərlə, qələbə ilə nəticələnib” - deyə diplomat vurğulayıb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
