ŞƏHƏR İCTİMAİYYƏTİNİN NÜMAYƏNDƏLƏRİ İLƏ GÖRÜŞ
Gəncə, 25 may (AZƏRTAC). Mayın 25-də Prezident İlham Əliyev Gəncədə ulu öndər Heydər Əliyevin adını daşıyan meydanda şəhər ictimaiyyətinin nümayəndələri ilə görüşüb səmimi söhbət etmişdir.
Gəncə Dövlət Universitetinin professoru Sevda QURBANƏLİYEVA dövlətimizin başçısına gəncəlilərin ən xoş arzularını çatdıraraq dedi:
- Möhtərəm cənab Prezident, Sizi Nizami yurdunda böyük sevinclə salamlayırıq, qədim Gəncəyə xoş gəlmisiniz. Qürur hissi keçiririk ki, bu, son illərdə Sizin Gəncəyə 9-cu səfərinizdir. Bu, bizim üçün böyük şərəfdir və Sizin Gəncəyə olan qayğınızı, məhəbbətinizi göstərir. Hər gəlişiniz şəhərimizə böyük yeniliklər gətirir. Biz gəncəlilər hər zaman Sizin qayğınızı hiss edirik və Sizi doğma, ən əziz bir insan kimi, gəncəli kimi qəbul edirik.
Cənab Prezident, bu gün ölkəmizin bütün regionları kimi, Gəncə də sürətlə inkişaf edir, abadlaşır. Burada böyük quruculuq işləri aparılır. Bu, Sizin gördüyünüz böyük işlərin nəticəsidir. Qədirbilən gəncəlilər bütün bunlara görə Sizi böyük məhəbbətlə qurucu İlham adlandırırlar.
Cənab Prezident, ölkəmizdə elmə, təhsilə, mədəniyyətə göstərdiyiniz qayğı bir musiqişünas alim kimi məni çox sevindirir. Mehriban xanımın mənəvi dünyamızda böyük yeri olan muğamlarımıza göstərdiyi həssas münasibət, digər sahələrdə gördüyü işlər hamımızın ürəyindəndir. Biz şəhərimizdəki tarixi-memarlıq abidələrinin bərpasına görə Sizə və Mehriban xanıma daim minnətdar olacağıq.
Bu gün biz fəxr edirik ki, hansısa bir ölkənin vassalı deyil, sözün əsl mənasında müstəqil dövlətin vətəndaşlarıyıq. Cənab Prezident, bu, ümummilli lider Heydər Əliyevin və Sizin müdrik siyasətinizin nəticəsidir. Biz Sizin fəaliyyətinizlə qürur duyuruq. Sizə dərin minnətdarlığımızı bildiririk. Çox sağ olun.
Prezident İlham ƏLİYEV: Təşəkkür edirəm. Mən sizin hamınızı ürəkdən salamlayıram. Gəncədə yenidən olmağımdan çox məmnunam. Hər dəfə bu şəhərdə olanda, buradakı gözəl yenilikləri görəndə ürəyim sevinir. Əminəm ki, siz də sevinirsiniz.
Son illər ərzində Gəncənin inkişafı üçün doğrudan da çox böyük işlər görülübdür. Həm yerli icra orqanları çox yaxşı işləyiblər, həm şəhər fəalları. Ümumiyyətlə, gəncəlilər özləri gözəl şəhərini qururlar və şəhər gözəlləşir, abadlaşır, yeni binalar tikilir. Çox sevindiricidir ki, hətta bu böhranlı aylarda da tikinti, demək olar ki, dayanmır. Düzdür, bütün dünyanı bürümüş böhran istər-istəməz Azərbaycana da öz təsirini göstərir. Ancaq biz çalışırıq ki, bu təsiri minimum səviyyəyə endirək. Böyük müəssisələrin müvəqqəti olaraq dayanması da əlbəttə, bir tərəfdən bizi narahat edir, digər tərəfdən Azərbaycanın artıq mövcud olan qüdrətli iqtisadi potensialı deməyə əsas verir ki, bu, müvəqqəti xarakter daşıyır. Əminəm ki, böyük müəssisələr fəaliyyətini yaxın zamanlarda bərpa edəcək. Orada işləyən insanlar isə dövlət tərəfindən təmin edilir, onların maaşları verilir və veriləcəkdir.
Gəncənin böyük tarixi var və mən çox şadam ki, şəhər öz tarixi simasını saxlamaqla müasirləşir, yeniləşir, çox gözəl binalar tikilir və bəzi köhnə binalar da bərpa olunur, təmir edilir. Bütün bunların çox böyük mənası var. Mən bu gün Bakıdan maşınla gələrkən böyük yol tikintisini də bir daha gördüm. Demək olar ki, Bakı-Gəncə avtomobil yolunun böyük əksəriyyəti artıq tikilib. Az hissə qalıb ki, o da ilin sonuna qədər bərpa edilməlidir, yenidən tikilməlidir və beləliklə, Bakıdan Gəncəyə çox rahat, özü də qısa müddət ərzində gəlmək mümkün olacaqdır.
Burada çox qədim tarixi binaların bərpası, tarixi abidələrin bərpası əlbəttə ki, çox sevindiricidir. Azərbaycan öz keçmişinə çox böyük hörmətlə yanaşır. Bir neçə gün bundan sonra biz Respublika gününü qeyd edəcəyik. 91 il bundan əvvəl Şərqdə ilk dəfə olaraq yaradılmış demokratik respublika dünya miqyasında çox böyük hadisədir. Gəncənin və gəncəlilərin bu işlərdə fəal iştirakı bütün Azərbaycan xalqına yaxşı bəllidir. Müstəqilliyin əsasları məhz burada qoyulmuşdur. Bütün dövrlərdə gəncəlilər Azərbaycanın müstəqil ölkə kimi yaşamasında çox mühüm işlər görmüşlər. Bu gün siz də qeyd etdiyiniz kimi, Azərbaycan müstəqil ölkə kimi yaşayır, müstəqil siyasət aparır, xalqın iradəsi ilə idarə olunur. Müstəqil siyasət bizə imkan verir ki, Azərbaycanın milli maraqları tam şəkildə müdafiə olunsun. İstər iqtisadi sahədə, istər siyasi sahədə, istər regionda baş verən hadisələrlə əlaqədar Azərbaycan nəinki öz sözünü deyir, hətta öz maraqlarını müdafiə də edə bilir.
O ki qaldı, gələcək işlərimizə, bizim işlərimiz sistemli xarakter daşıyır. Son beş ildə regionların sosial-iqtisadi inkişafı Dövlət Proqramının qəbul edilmiş qərarlar əsasında uğurlu icrası çox müsbət haldır. Növbəti beş il üçün yeni proqram tərtib olunub və icra edilməyə başlanmışdır.
Bizim iqtisadiyyatımızın əsas sahəsi energetikadır və dünyada neftin qiymətinin kəskin şəkildə düşməsi ilə bağlı bütün neft ixrac edən ölkələr, o cümlədən Azərbaycan da müəyyən çətinliklərlə üzləşib. Amma buna baxmayaraq, bütün sosial proqramlar icra olunur, infrastruktur layihələri davam etdirilir. Böhranın deyə bilərəm ki, Azərbaycana müsbət təsiri də olmuşdur. O da ondan ibarətdir ki, istehlak qiymətləri aşağı düşüb. Ancaq büdcə təşkilatlarında çalışan insanların əmək haqları vaxtında ödənilir, pensiyalar ödənilir və ildən-ilə onların məbləği artır, gələcəkdə də artacaqdır.
Bu aylar ərzində iqtisadiyyatımız da artıb. Bütün dünyada iqtisadi tənəzzül müşahidə edilir, Azərbaycanda iqtisadi artım. Yəni bu, bir də onu göstərir ki, bizim uğurlarımızın əsas səbəbi neftin qiyməti deyil, əsas səbəbi aparılan islahatlardır və cəmiyyətdəki çox gözəl əhval-ruhiyyə, ab-havadır. Əlbəttə ki, Azərbaycanın ikinci şəhəri Gəncənin belə gözəl görkəm alması bütövlükdə Azərbaycanda gedən işlərin nəticəsidir.
Mən bütün bu uğurlarla, son illər ərzində əldə edilmiş uğurlarla sizi ürəkdən təbrik edirəm, sizə yeni-yeni uğurlar arzulayıram. Sizə söz verirəm ki, mən həmişə olduğu kimi, Gəncəyə xüsusi diqqət göstərəcəyəm və şəhərin inkişafı üçün bütün lazımi tədbirlər görüləcəkdir. Sağ olun.
######
 |
 |
Bölmənin digər xəbərləri
