Şəhidlərimizin adlarını yaşatmaq, gələcək nəsillərə onları nümunə göstərmək hamının ən müqəddəs borcudur
Bakı, 27 sentyabr, AZƏRTAC
Azərbaycan Respublikası Gənclər Təşkilatları Milli Şurası (ARGTMŞ) 44 günlük Şanlı Zəfər tariximizin üçüncü ildönümü münasibətilə bir sıra tədbirlər keçirib.
Gənclər Təşkilatları Milli Şurasından AZƏRTAC-a bildiriblər ki, əsas məqsəd 27 Sentyabr - Anım Günü ilə bağlı gənclərin məlumatlılığını artırmaq, həmçinin 44 günlük qürurlu tariximizin gənclər arasında təbliğidir. Əvvəla, Azərbaycan Dövlət Neft və Sənaye Universitetində Milli Məclisin deputatı Naqif Həmzəyevin, Vətən müharibəsi qaziləri Azay Tağızadə və Vüsal Yusifovun iştirakı ilə tədbir təşkil olunub.
ARGTMŞ-nin sədri Azər Əliyev çıxış edərək ölkəmizin qazandığı böyük Zəfərin dövlətimizin başçısı, Müzəffər Ali Baş Komandan İlham Əliyevin yürütdüyü müdrik və uzaqgörən siyasət, onun rəhbərliyi ilə rəşadətli Azərbaycan Ordusunun şücaəti nəticəsində mümkün olduğunu diqqətə çatdırıb. O, həmçinin Azərbaycanın Vətən müharibəsində qazandığı Qələbə ilə bütün dünyaya öz gücünü və haqq-ədalət uğrunda qətiyyətli mübarizəsini əyani şəkildə göstərdiyini və şəhidlərimizin adlarını yaşatmağın, gələcək nəsillərə örnək, nümunə göstərməyin hər birimizin üzərinə düşən ən müqəddəs borc olduğunu xüsusilə vurğulayıb.
Moderatorluğunu ARGTMŞ-nin sədr müavini Ülviyyə Axundovanın etdiyi və 60-dan çox gənclər təşkilatının rəhbər və nümayəndəsinin iştirakı ilə keçirilən tədbirdə İkinci Qarabağ müharibəsi, gənclərin informasiya müharibəsində fəal iştirakının dövlətimiz üçün əhəmiyyəti, antiterror tədbirlərindəki qələbəmiz və sair məsələlər müzakirə olunub. Həmçinin iştirakçıların ünvanladıqları suallar cavablandırılıb.
Tədbirlərin davamı kimi 500-dən çox gənclər təşkilatının rəhbər və nümayəndəsinin iştirakı ilə İkinci Şəhidlər xiyabanı ziyarət olunaraq şəhidlərimizin əziz xatirəsi ehtiramla anılıb.
Bundan başqa, sentyabrın 27-dən noyabrın 8-i Zəfər Gününədək gənclər təşkilatlarının rəhbərlərinin iştirakı ilə regionlara səfərlər təşkil olunacaq. Həmin regionlarda Ulu Öndər Heydər Əliyevin abidəsi və Şəhidlər xiyabanına ziyarət təşkil ediləcək. Həmçinin 44 günlük Vətən müharibəsi zamanı dağıdılmış, zərər görmüş ərazilər də ziyarət olunacaq.
Eyni zamanda, gənclər təşkilatlarının rəhbərləri qeyd edilən regionlardakı şəhid ailələrinə baş çəkəcək və universitetlərdə gənclərlə müzakirə xarakterli görüşlər keçirəcək. Ali Baş Komandanın qətiyyətli mövqeyi, Vətən Müharibəsi zamanı və sonra atılan diplomatik addımlar və gənclərin bu sahədə reallaşdırmalı olduqları fəaliyyətlər görüşlərin əsas müzakirə mövzusu olacaq.
Bölmənin digər xəbərləri
