Şəki bayram tətilinə hazırdır: Hotellərdə doluluq faizi maksimuma çatıb
Şəki, 29 dekabr, Rasim İslamoğlu, AZƏRTAC
Qarşıdan bayram tətili günləri gəlir. İnsanlar birhəftəlik istirahət günlərini daha mənalı və yaddaqalan keçirmək üçün indidən seçim edirlər. Tətilini bölgələrdə keçirmək istəyənlər az deyil. İlk növbədə, tarixi və qədim məkanlara, turizm infrastrukturu olan rayonlara üz tutanların sayı hər gün artır. Bu baxımdan qədim Şəki turistlərin üstünlük verdiyi məkanlardandır. Qədim şəhərin küçə və meydanları, tarixi məkanları ilin bütün fəsillərində qonaqlı-qaralı olur desək, yanılmarıq. Bununla yanaşı, rayonun artıq kəndlərində yeni turizm infrastrukturu təşkil olunub ki, bu da bölgələrdə bir ilk sayılır. Bəs, Şəkidə bayram tətilinə necə hazırlıq görülür?
Şəki təkcə ölkəmizdə deyil, dünyada memarlığına, tarixi abidələrinə görə tanınır.
AZƏRTAC-ın bölgə müxbirinin məlumatına görə, 2700-dən çox yaşı olan və tarixi irsi özündə birləşdirən bu qədim şəhərə üz tutanları burada yetərincə maraqlı məkanlar, yaddaqalan anlar gözləyir. Turizm meneceri Aqil Məsimov deyir ki, son illər şəhərdə, eləcə də kəndlərdə turizm sektorunda canlanma var. Xüsusən otel, hostel, butiklərə, eləcə də kənd evlərinə maraq xeyli artıb.
Aqil Məsimov son illərdə Şəkidə 20-dən artıq otel, hostel və butikin fəaliyyətə başladığını və hər birinin tam şəraitli olduğunu, hətta günlük evlərin də şəraitinin yaxşılaşdığını bildirir. “Bir məsələni də qeyd edim ki, Şəkidə “afreym” evlərin də sayı çoxalır. Xüsusən isti hovuzlu “afreym”lərə daha çox üstünlük verildiyi üçün qış aylarında onlara tələbat artır”, - deyən turizm meneceri vurğulayıb ki, Şəkidə normal şəraiti olan evlərin qiyməti 4-5 nəfərlik ailə üçün 60 manat-150 manat arasında dəyişir. Hotellərdə 2 nəfər üçün 90 manat-150 manat, villa tipli evlərdə 150-200 manat, isti hovuzlu “afreym” və “kapsul” evlərdə 150- 350 manat arasında yer tapmaq olar.
Tətil günləri yolu Şəkidən, yaxud bölgədən düşənlərə xatırlatmaq istədiyimiz bir vacib mövzu da var. Bu da şəhərin mədəni həyatı ilə bağlıdır. Belə ki, qonaqlar və onların azyaşlı ailə üzvləri Şəki Dövlət Dram Teatrında Yeni il üçün hazırlanan tamaşalara baxa bilərlər.
Dünya memarlıq incisi Şəkidə sənətkarlığa xüsusi önəm verilir, bu baxımdan şəbəkə sənəti xüsusi qeyd olunmalıdır. Təsadüfi deyil ki, dünyada və Azərbaycanda ilk şəbəkə mərkəzi də bu qədim şəhərdə fəaliyyət göstərir. Mərkəzin əməkdaşı, şəbəkə ustası İlqar Rəsulzadə yeni əl işlərini təqdim etməklə yanaşı, müxtəlif ölkələrdən gələn qonaqlara ustad dərslərinin veriləcəyini söyləyir: “Bizim şəbəkə mərkəzimiz il boyu fəaliyyət göstərir. İl boyu turistlərin xidmətindəyik. Bizdə əl işlərinin sərgisi, eləcə də qonaqlar üçün ustad dərsləri təşkil olunur. Bayram tətili günlərində həm yerli, həm də xarici turistlər bizim ustad dərslərində iştirak edə, şəbəkə sənəti ilə daha yaxından tanış ola bilərlər”.
Turizm meneceri Aqil Məsimov son illər ölkəmizdə daxili turizmdə yetərincə canlanma müşahidə olunduğunu, qonaqların kənd turizminə böyük maraq göstərdiyini bildirir. Elə bu səbəbdəndir ki, rayonun kəndlərində bir neçə yeni turizm-istirahət mərkəzi fəaliyyətə başlayıb. Belə mərkəzlərdən biri rayonun Baş Zəyzid kəndində, dağların qoynunda yerləşir.
Turizm-istirahət mərkəzinin nümayəndəsi Xanlar Həşimzadə ilə söhbət edirik. Deyir ki, dağlar və meşələrlə əhatə olunan bu məkanda “kapsul ev”, yəni modul ev, eləcə də “afreym” evlər fəaliyyət göstərir: “Məqsədimiz qonaqların şəhərin səs-küyündən uzaqlaşıb rahat istirahət edə biləcəyi, unudulmaz istirahət keçirəcəyi bir şəraiti yaratmaqdır. Buna da nail ola bilmişik. Qiymətlərə gəldikdə, ilin fəsillərinə görə dəyişir və müştərilərimizə həmişə endirimlər edirik”. X.Həşimzadə turizm-istirahət mərkəzində dağ çayının sularından istifadə olunduğunu, məkana üz tutanların orqanik kənd məhsullarından faydalandığını, eləcə də dağ və meşə gəzintisində iştirak etməklə təbii giləmeyvələrdən toplayıb aparmaq imkanı qazandıqlarını da vurğulayır.
Şəki-Zaqatala Regional Turizm İdarəsindən verilən məlumata görə, Şəki rayonunda 42 yerləşmə müəssisəndə 838 nömrə fondu var və qarşıdan gələn bayram günlərində əksər yerləşmə müəssisələrində bayram paketi formasında satış həyata keçirilib və doluluq faizi maksimum səviyyədədir.
Bölmənin digər xəbərləri
