Şəki Regional Elmi Mərkəzi Oğuzda seminar keçirib
Bakı, 15 may, AZƏRTAC
AMEA-nın Şəki Regional Elmi Mərkəzinin (REM) və Oğuz rayonu Əjdər Mahmudov adına Qarabulaq kənd tam orta məktəbinin birgə təşkilatçılığı ilə "Konstitusiya və Suverenlik İli" çərçivəsində məktəblilərin maarifləndirilməsi məqsədilə "Azərbaycanın müstəqilliyi Şimal-qərb bölgəsinin ekoloji problemlərinin həllində dönüş nöqtəsi kimi" mövzusunda seminar keçirilib.
Bu barədə AZƏRTAC-a AMEA-dan bildirilib. Seminarda çıxış edən Qarabulaq kənd tam orta məktəbin direktoru Elçin Yusubov "Konstitusiya və Suverenlik İli” çərçivəsində bu cür tədbirlərin keçirilməsində orta məktəbin tərəfdaş kimi seçilməsinin qürurverici olduğunu və bunun gələcəkdə əməkdaşlıq əlaqələrinin qurulması üçün zəmin yaratdığını bildirib.
Sonra Şəki Regional Elmi Mərkəzinin Ekoloji coğrafiya şöbəsinin elmi işçisi Aygün İsmayılova "Ekologiya və ətraf mühitin mühafizəsi müstəqillik dövründə: çağırışlar və imkanlar" mövzusunda məruzəsini təqdim edib. O, çıxışında Azərbaycan Respublikası Konstitusiyasının 39-cu "Hər kəsin sağlam ətraf mühitdə yaşamaq hüququ vardır" maddəsini əsas gətirərək, sağlam və ekoloji təmiz mühitin yaradılmasında insanların üzərinə düşən vəzifə borclarından danışıb, şagirdləri təbiətə qayğı və məsuliyyətlə yanaşmağa, onu qorumağa, ekosistemin mühafizəsi istiqamətində dövlətə dəstək olmağa çağırıb. Məruzəçi iqlim dəyişikliklərinə qarşı mübarizənin təkcə ekologiya ilə bağlı deyil, həm də sosial ədalət, insan hüquqları və qlobal təhlükəsizlik məsələsi olduğunu qeyd edib.
Sonra məktəbin direktor müavini Cavid Qocayev Qarabulaq kəndinin coğrafi mövqeyi, relyefi, iqlim şəraiti, təbii və mineral su ehtiyatları, bitki örtüyü və heyvanat aləmi haqqında ətraflı məlumat verib.
Ekoloji coğrafiya şöbəsinin elmi işçisi Xəzər Bəşirov "Azərbaycanın yaşıl enerji hədəfləri və yaşıl enerjinin ekoproblemlərin həllində rolu" mövzusunda çıxış edib. O, yaşıl enerjidən istifadənin iqlim dəyişikliyini azaltmağa və qlobal istiləşməni məhdudlaşdırmağa kömək etməsindən, havanın keyfiyyətinin yaxşılaşdırılmasında mühüm rolundan danışıb.
Landşaftşünaslıq şöbəsinin elmi işçisi Murad Qəhrəmanov isə "Azərbaycanın Oğuz rayonu ərazisində səhralaşma problemi" mövzusunda çıxış edərək Şəki REM-də şimal-qərb regionu üzrə tədqiqatların aparıldığını deyib. O, Oğuz rayonu üzrə səhralaşma prosesinin iqlimdən asılılığını müəyyən etmək üçün gündəlik aparılan meteoroloji monitorinqlərin nəticələri, hava sirkulyasiyasında olan istiqamət dəyişmələri haqqında məlumat verib. Məruzəçi rayonda səhralaşma prosesinin digər bölgələrdə olduğu kimi, relyef, iqlim, bioloji səbəblərlə yanaşı, antropogen təsirdən irəli gəldiyini diqqətə çatdırıb və şagirdlərə problemlərin həlli yolları istiqamətində tövsiyələrini verib.
Ekoloji coğrafiya şöbəsinin əməkdaşı Elvin Qarayev çıxışında zəngin mineral-xammal ehtiyatları, gözəl meşə örtüyü, isti-mineral bulaqları, tarixi-mədəni abidələri, əsrarəngiz təbiəti ilə seçilən kurort-turizm imkanlarına sahib Oğuz destinasiyasının Azərbaycan turizmində böyük əhəmiyyətə malik olmasından bəhs edib.
Sonda hər iki təşkilat tərəfindən təşəkkürnamələr təqdim edilib. Şəki REM-in nəşri olan kitablar məktəbin kitabxanasına hədiyyə edilib.
Bölmənin digər xəbərləri
