Şərqşünaslıq İnstitutunda akademik Ziya Bünyadovun 100 illik yubileyi qeyd ediləcək
Bakı, 10 oktyabr, AZƏRTAC
AMEA-nın akademik Ziya Bünyadov adına Şərqşünaslıq İnstitutunun Elmi şurasının növbəti iclası keçirilib. İclasın əvvəlində Azərbaycanın ərazi bütövlüyü uğrunda şəhid olmuş qəhrəman Vətən övladlarının əziz xatirəsi bir dəqiqəlik sükutla yad edilib.
Bu barədə AZƏRTAC-a institutdan məlumat verilib. Bildirilib ki, AMEA-nın vitse-prezidenti vəzifəsini icra edən, Şərqşünaslıq İnstitutunun baş direktoru akademik Gövhər Baxşəliyeva erməni silahlı qüvvələrinin çoxsaylı təxribatlarına cavab olaraq, lokal xarakterli qısa müddətli antiterror tədbirləri nəticəsində Azərbaycanın tarixində böyük Qələbə əldə edildiyini deyib. O, institutun kollektivi adından bu Qələbənin memarı olan Müzəffər Ali Baş Komandan İlham Əliyevə təşəkkürünü bildirib, şəhidlərimizin qarşısında baş əydiklərini qeyd edib.
G.Baxşəliyeva bu yaxınlarda Prezident İlham Əliyevin akademik Ziya Bünyadovun 100 illik yubileyinin keçirilməsi haqqında müvafiq Sərəncam imzaladığını xatırladıb və buna görə dövlətimizin başçısına təşəkkürünü bildirib. Yubileylə bağlı bir sıra tədbirlərin həyata keçiriləcəyini deyən akademik Şərqşünaslıq İnstitutunun dekabr ayında “Qədim və müasir Şərq: mənbələr, araşdırmalar və gələcək inkişaf perspektivləri” (“Ziya Bünyadov qiraətləri”) mövzusunda beynəlxalq elmi konfrans keçirəcəyini diqqətə çatdırıb.
Sonra Şərqşünaslıq İnstitutunun elmlər və fəlsəfə doktorluğu üzrə dissertantların və onların mövzularının, elmi məsləhətçi və rəhbərlərinin təsdiqi məsələsinə baxılıb. Müzakirəyə təqdim edilənlər sırasında “Orta Asiyanın türk dövlətlərinin Ermənistan Respublikası ilə münasibətləri”, “Türkiyə-İran münasibətləri ABŞ-ın xarici siyasət prizmasında”, “Cənubi Azərbaycan şairlərinin farsdilli yaradıcılığında Azərbaycan dilinin təsiri”, “Çağdaş türk ədəbiyyatşünaslığının inkişafında Orhan Okayın rolu”, “Çin və Avropa Birliyi ölkələri arasındakı nəqliyyat-kommunikasiya əlaqələrində Azərbaycan Respublikasının rolu”, “İctimai-dini fikrin formalaşmasında Qərbi Azərbaycan İslam alimlərinin rolu (XVII-XX əsrlər)”, “Orta əsrlər nəsrində təsəvvüf və Əbubəkr ibn Xosrov əl-Ustadın yaradıcılığı”, “Ərəb ədəbi dilində simvolların linqvokulturoloji xüsusiyyətləri”, “Məmmədhüseyn Şəhriyarın farsca divanının linqvopoetik sistemi”, “Yaxın dillərdən bədii tərcümənin elmi-nəzəri prinsipləri (türk-Azərbaycan romanları əsasında)” və s. mövzular yer alıb.
İclasda bir sıra təşkilati və digər məsələlərə baxılıb.
Bölmənin digər xəbərləri
