“Səyyar Gənclər Xidməti” layihəsi Qusar gənclərinə xidmət göstərib
Qusar, 31 oktyabr, Elxan Yusifli, AZƏRTAC
Qusarda “Səyyar Gənclər Xidməti” layihəsinin növbəti mərhələsi başa çatıb.
AZƏRTAC-ın bölgə müxbiri xəbər verir ki, layihə Azərbaycan Respublikasının Gənclər Fondunun dəstəyi, “Gənc Könüllülər” ictimai birliyi və Gənclərin İnkişaf və Karyera Mərkəzinin tərəfdaşlığı ilə oktyabrın 27–31-də həyata keçirilib.
“Suveren dövlət, vətənpərvər gənclik” devizi altında reallaşan tədbir Qusar gənclərinin liderlik, şəxsi inkişaf və peşəyönümlü bacarıqlarının artırılmasına xidmət göstərib.
Layihənin açılışı Dövlət Himninin səsləndirilməsi və torpaqlarımızın ərazi bütövlüyü uğrunda şəhid olmuş qəhrəmanların xatirəsinin bir dəqiqəlik sükutla yad edilməsi ilə başlanıb.
Çıxışlarda Qusar Rayon İcra Hakimiyyətinin ictimai-siyasi məsələlər şöbəsinin müdiri Kamran Sədullayev, Gənclərin İnkişaf və Karyera Mərkəzinin Baş direktoru Azər Əliyev və “Gənc Könüllülər” İctimai Birliyinin sədri Ayxan Allahverdiyev layihənin gənclərin intellektual və sosial potensialının üzə çıxarılmasındakı əhəmiyyətindən bəhs ediblər.
Xidmət çərçivəsində gənclər peşə seçimi, karyera planlaması, süni intellekt texnologiyaları, narkomaniya ilə mübarizə, sağlam həyat tərzinin təşviqi və motivasiya kimi mövzularında təşkil olunan maarifləndirici sessiyalarda biliklərini dərinləşdiriblər. Layihənin praktiki hissəsində Qusar gəncləri onlar üçün yaradılmış zonalarda interaktiv sessiyalar, vörkşoplar və intellektual yarışlarda iştirak edərək həm bacarıqlarını nümayiş etdirib, həm də sosiallaşıblar. Layihənin sonunda fəal iştirakçılar müxtəlif hədiyyələrlə təltif olunub.
Prezident İlham Əliyev tərəfindən 2025-ci ilin “Konstitusiya və Suverenlik İli” elan olunması çərçivəsində reallaşan bu təşəbbüs gənclərin dövlət suverenliyi və müstəqillik anlayışlarını daha dərindən dərk etməsinə, tarixi Zəfərimizin mahiyyətini gənc nəslə aşılanmasına və regionlarda innovativ təşəbbüslərin geniş yayılmasına töhfə verir.
Cari il avqustun 5-dən etibarən icra olunan Səyyar Gənclər Xidməti bu günədək Cəbrayıl, Ağdam, Tərtər, Goranboy, Göygöl, Daşkəsən, Gədəbəy, Qax, Zaqatala, Balakən və Şəki rayonlarında uğurla həyat keçirilib.
Bölmənin digər xəbərləri
