“Şimal Elektrik Stansiyası”nda yanğın təhlükəsizliyinə dair tədbir keçirilib
Bakı, 6 mart, AZƏRTAC
Fövqəladə Hallar Nazirliyinin (FHN) Dövlət Yanğından Mühafizə Xidməti “Azərenerji” Açıq Səhmdar Cəmiyyətinin “Şimal Elektrik Stansiyası”nda yanğın təhlükəsizliyinə dair tədbir keçirib.
FHN-dən AZƏRTAC-a bildiriblər ki, tədbirdə rəhbər və mühəndis heyəti ilə birlikdə obyektin ümumi ərazisinin, istehsalat sahələrinin yanğın təhlükəsizliyi ilə bağlı vəziyyəti öyrənilib, aşkar olunmuş çatışmazlıqların aradan qaldırılmasına dair tövsiyələr verilib. Eyni zamanda, stansiyada “Energetika müəssisələrində yanğın təhlükəsizliyi: ərazi, bina və avadanlığa olan tələblər” mövzusunda nəzəri-praktiki seminar keçirilib.
Seminarda mühəndis və texniki işçilərə, fəhlə və qulluqçulara artıqyüklənmə, qısaqapanma, izolyasiyanın pozulması, naqillərin müvafiq texniki qaydalara uyğun çəkilməməsi, montaj işlərindəki nöqsanlar və yanğın təhlükəsizliyinə zidd digər halların baş verməməsi üçün qabaqlayıcı tədbirlərin görülməsinin zəruriliyi diqqətə çatdırılıb.
Tədbirdə yanğın təhlükəsizliyi, ilk tibbi yardımın göstərilməsi qaydaları barədə də məlumat verilib. Həmçinin odsöndürən balonlardan istifadə qaydası əyani nümayiş etdirilib.
Bölmənin digər xəbərləri
