Şimal-qərb bölgəsinin məktəbliləri şahmat yarışında qüvvələrini sınayıblar
Şəki, 9 aprel, Mustafa Dadaşov, AZƏRTAC
Heydər Əliyev Fondu və Elm və Təhsil Nazirliyinin birgə əməkdaşlığı ilə reallaşdırılan “Zəkaların mübarizəsi” olimpiadası çərçivəsində aprelin 9-da Şəki şəhərində şimal-qərb bölgəsinin ümumi təhsil müəssisələrinin şagirdləri arasında regional şahmat turniri keçirilib.
Bu barədə AZƏRTAC-ın bölgə müxbirinə Şəki-Zaqatala Regional Təhsil İdarəsindən məlumat verilib.
Rasim Ocaqov adına Şəki şəhər Uşaq-Gənclər İnkişaf Mərkəzində təşkil olunan turnirin açılışında Regional Təhsil İdarəsinin müdiri Günay Mahmudova, Təhsil İşçiləri Azad Həmkarlar İttifaqı Şəki Rayon Komitəsinin sədri Ziyafət Xasiyeva və başqaları çıxış edərək, bu cür layihələrin şagirdlərin intellektual inkişafı və məntiqi düşünmə bacarıqlarının formalaşmasında mühüm rol oynadığını vurğulayıblar.
Şahmat yarışının yekun nəticələrinə əsasən, Şəki rayonunu təmsil edən komanda turnirin qalibi adını qazanıb. Zaqatala və Balakən rayonlarının komandaları müvafiq olaraq ikinci və üçüncü yerləri tutublar.
Qeyd edək ki, olimpiadanın keçirilməsində əsas məqsəd müxtəlif sahələrdə bilik və bacarığı ilə seçilən istedadlı gəncləri aşkar etmək, şagirdlərdə əməkdaşlıq, səmərəli ünsiyyət, liderlik keyfiyyətləri, müzakirə mədəniyyəti, qərar vermə, komanda ilə işləmə, analitik və məntiqi düşünmə, planlaşdırma və strategiya qurma bacarıqlarını inkişaf etdirmək, onlar arasında sağlam rəqabət mühitini formalaşdırmaq və region gəncləri arasında ünsiyyət mühitini genişləndirməkdir.
Bölmənin digər xəbərləri
