Şirvanda “KOB Dostu” fəaliyyətə başlayıb
Bakı, 4 fevral, AZƏRTAC
Şirvan şəhərində “KOB Dostu” fəaliyyətə başlayıb.
Kiçik və Orta Biznesin İnkişafı Agentliyindən (KOBİA) AZƏRTAC-a bildirilib ki, Şirvan şəhərində, eləcə də ona yaxın ətraf bölgələrdə fəaliyyət göstərən mikro, kiçik və orta sahibkarlıq subyektləri və öz biznesini qurmaq istəyən potensial sahibkarlar biznes fəaliyyəti ilə bağlı dəstək və xidmətlər üçün Şirvan “KOB Dostu”na müraciət edə bilərlər. Şirvan “KOB Dostu” ofisi Şirvan Gənclər Mərkəzində yerləşir.
Digər KOB dostları kimi, Şirvan “KOB Dostu” da iqtisadi rayonda yeni KOB-ların yaranmasına və mövcud KOB-ların inkişafına hərtərəfli dövlət dəstəyini yerində təmin edəcək, bu məqsədlə mövcud dövlət dəstəyi mexanizmləri və agentliyin xidmətləri (informasiya, məsləhət, hüquqi yardım, dövlət və özəl qurumlarla əlaqələndirmə və sair) çərçivəsində sahibkarlara zəruri dəstək göstərəcək, KOB-ların maraqlarının müdafiəsi, qarşılaşdıqları çətinliklərin həlli istiqamətində dövlət-sahibkar əməkdaşlığı platforması çərçivəsində müvafiq tədbirlər görəcək. Həmçinin Şirvan “KOB Dostu” sahibkarların inkişaf ehtiyaclarını və təkliflərini sorğular vasitəsilə öyrənəcək, KOB-lara göstərilən dəstək və xidmətlərin təkmilləşdirilməsi, əhatə dairəsinin genişləndirilməsi məqsədilə monitorinqlər aparacaq.
Hazırda ölkənin 21 şəhər və rayonunda 26 “KOB Dostu” fəaliyyət göstərir. 2021-ci il ərzində Salyan, İsmayıllı, Hacıqabul, Sabirabad, Göyçay və digər şəhər və rayonlarda da KOB dostlarının fəaliyyətə başlaması nəzərdə tutulur.
Bölmənin digər xəbərləri
