Siyasi şərhçi : Prezident İlham Əliyevin BMT-dəki çıxışı bir zəfər nitqi idi
Bakı, 26 sentyabr, AZƏRTAC
Ötən gün BMT-nin tribunasında Prezident İlham Əliyevin çıxışı uzun illərin haqsızlıqlarından sonra ədalətin bərpasını elan edən bir zəfər nitqi idi. Dövlətimizin başçısı illər boyu beynəlxalq tribunalarda Azərbaycanın haqq səsini səsləndirmişdi, indi isə qələbəyə, sülhə aparan yoldan, sülhün təmin edilməsindən bəhs edirdi. Bu, tarixi anlar idi.
Bunu AZƏRTAC-a açıqlamasında siyasi şərhçi Ülviyyə Zülfiqar deyib.
Onun fikrincə, bu nitq Azərbaycan diplomatiyasının çoxsaylı uğurlarının bir daha dünya birliyinin gözləri önünə gətirilməsi ilə yanaşı, həm də Azərbaycanın sülhyönümlü siyasətinin, inkişafmeyilli addımlarının bəyanı idi.
“Ölkə başçısı qeyd etdi ki, uzun illər ərzində Azərbaycan torpaqlarının təxminən 20 faizi Ermənistan tərəfindən işğal altında olmuş, bir milyon azərbaycanlı öz vətənindən qovulmuşdu. Prezident İlham Əliyev vurğuladı ki, BMT Təhlükəsizlik Şurasının dörd qətnaməsi işğal olunmuş ərazilərdən Ermənistan silahlı qüvvələrinin “təcili, tam və qeyd-şərtsiz” çıxarılmasını tələb etsə də, heç biri icra edilməmişdi. Dövlətimizin başçısı ATƏT-in Minsk qrupunun uğursuz fəaliyyətini də beynəlxalq ictimaiyyətin təsirsiz və etinasız vasitələrindən biri kimi dəyərləndirərək, artıq tarixin arxivinə yuvarlandığını bildirdi. Azərbaycan ədaləti bərpa etdi, bölgədə sülhün təminatçısına çevrildi, ikili standartların görməzdən gəldiyi haqsızlıqları aradan qaldırdı.
Dövlətimizin başçısının çıxışı, yerləşdiyi geosiyasi reallıqda sülhü bərpa edən bir ölkənin bütün dünyaya sülh çağırışı idi. Uzun illərdən sonra bu bölgədə sülh təmin olundu, beynəlxalq hüququn prinsipləri öz yerini tapdı. Demək ki, digər münaqişə ocaqlarına da sülhün gəlməsi mümkündür”, - deyə Ülviyyə Zülfiqar vurğulayıb.
Bölmənin digər xəbərləri
