Bakı, 25 sentyabr, AZƏRTAC

Somalinin mərkəzində törədilən terror aktı nəticəsində ölənlərin sayı 21 nəfərə çatıb.

AZƏRTAC xarici KİV-lərə istinadla xəbər verir ki, binaların dağıntıları altından daha 8 nəfərin cəsədi aşkarlanıb. Bununla ölənlərin sayı 21 nəfərə yüksəlib.

Bundan əlavə, azı 45 nəfər yaralanıb. İtkin düşənlərin axtarışı davam edir.

Qeyd edək ki, sentyabrın 23-də ölkənin Beledveyn şəhərində nəzarət-buraxılış məntəqəsində partlayış baş verib. Partlayıcılarla dolu yük maşını ilə törədilən terror hadisəsi nəticəsində onlarla insan kərpic və beton qalaqları altında qalıb.