STRASBURQDA ŞUŞANIN İŞĞALININ 15 İLLİYİ İLƏ BAĞLI ELMİ-PRAKTİKİ KONFRANS KEÇİRİLMİŞDİR
AZƏRTAC-ın xüsusi müxbiri xəbər verir ki, Şuşanın ermənilər tərəfindən işğal edilməsinin 15 illiyi ilə bağlı mayın 5-də Strasburq şəhərində Dünya Azərbaycanlıları Konqresinin təşəbbüsü ilə elmi-praktiki konfrans keçirilmişdir.
Milli Məclisin deputatları, Bakıdan gəlmiş nümayəndə heyətinin, Almaniya və İsveşdəki diasporun təmsilçilərinin, Azərbaycanın Avropa Şurası yanındakı daimi nümayəndəliyi əməkdaşlarının, Strasburqda və Alzas bölgəsində yaşayan soydaşlarımızın, tələbələrimizin iştirakı ilə keçirilmiş konfransın əvvəlində Azərbaycanın dövlət himni səslənmişdir. DAK-ın sədri Cavad Dərəxti qonaqları salamlamış, Azərbaycanın dilbər guşəsi Şuşanın 1992-ci il mayın 8-də torpaqlarımız hesabına öz ərazisini genişləndirməyə çalışan, xalqımıza qarşı soyqırımı siyasəti aparan ermənilər tərəfindən işğal edildiyini xatırlatmışdır.
Konfransda Azərbaycanın Avropa Şurası yanında daimi nümayəndəliyinin rəhbəri Arif Məmmədov, DAK sədrinin müavini Xəzər Eminov, Milli Məclisin deputatları Gülər Əhmədova və Qənirə Paşayeva, İsveçdəki diasporun nümayəndəsi Nasir Məmmədi, Strasburqdakı “Azərbaycan Evi” Cəmiyyətinin sədri Mustafa Alınca, xalq artistləri İlhamə Quliyeva və Niyaməddin Musayev çıxış edərək X.Natəvan, Q.Zakir, Ü.Hacıbəyov, Ə.Haqverdiyev, C.Qaryağdıoğlu, X.Şuşinski kimi tanınmış şair, yazıçı, bəstəkar və xanəndələrimizin vətəni, Azərbaycanın mədəniyyət beşiyi Şuşanı işğal etmiş erməni qəsbkarlarının əhaliyə qarşı törətdikləri vəhşiliklərdən bəhs etmiş, xalqımızın tarixini əks etdirən dünya əhəmiyyətli abidələrini, yüzlərlə təhsil və mədəniyyət ocağını məhv etdiklərini bildirmiş, Şuşa üzərindəki “qələbə”nin 15 illiyini Fransa və digər dövlətlərdə qeyd etməyə hazırlaşan ermənilərin bu hərəkətinə qarşı bütün azərbaycanlıların müvafiq addımlar atmalarının zəruriliyi qeyd olunmuş, Prezident İlham Əliyevin dəfələrlə “Dağlıq Qarabağ heç vaxt Ermənistanın tərkibində olmamış və olmayacaqdır” sözləri xüsusi diqqətə çatdırılmış, türk və Azərbaycan xalqlarına qarşı həmişə böhtan və iftiralar yağdırmaq iddiasından əl çəkməyən ermənilərin uydurma “soyqırımı” pərdəsi altında dünya ictimaiyyətinin diqqətini özlərinin əsas işğalçılıq siyasətini gizlətdiklərini açıqlamış, Azərbaycanın iqtisadi qüdrətinin gündən-günə gücləndiyi xüsusi vurğulanmış, xarici ölkələrdə yaşayan bütün azərbaycanlıların öz doğma vətənləri ətrafında daha da sıx birləşmələrinə dair çağırışlar səslənmişdir.
Tanınmış yazıçı-dramaturq Əmir Pəhləvan Şuşanın Daşaltı kəndi uğrunda gedən döyüşlərdə şəhid olmuş Milli Qəhrəman, polkovnik Riad Əhmədovun unudulmaz xatirəsinə həsr etdiyi “Əsl qəhrəman” poemasını oxumuş, xalq artistləri İlhamə Quliyevanın və Niyaməddin Musayevin ifasında Qarabağ haqqında mahnılar səslənmişdir.
Sonda Dünya Azərbaycanlıları Konqresinin fəaliyyətinin genişləndirilməsi barədə fikir mübadiləsi aparılmışdır.
Bölmənin digər xəbərləri
