SUMQAYIT POLİSİ İLİ UĞURLA BAŞA VURMUŞDUR
Sumqayıtda keçirilmiş yığınçaqda şəhər polis idarəsinin 2001-ci ildəki fəaliyyətinə yekun vurulmuşdur.
Şəhər polis idarəsinin rəisi, polis polkovniki Sevindik Səfərov məruzə ilə çıxış edərək demişdir ki, şəhərin hüquq-mühafizə sisteminin bütün qurumlarının əlaqələndirilmiş və mütəşəkkil fəaliyyəti sayəsində həm cinayətkarlıqla mübarizədə, ictimai asayışın mühafizəsinin təmin olunmasında, vətəndaşlarda olan silah və döyüş sursatının yığılmasında, narkotik maddələrin satışı və saxlanılması faktlarının üzə çıxarılmasında, həm də Azərbaycan Respublikasının Prezidenti Heydər Əliyevin milli mənəvi dəyərlərin qorunub saxlanılması haqqında müraciətində irəli sürülmüş vəzifələrin yerinə yetirilməsində xeyli uğurlar dazanılmışdır.
Ötən müddət ərzində 664 cinayət hadisəsi qeydə alınmış və onların 95,2 faizinin üstü açılmışdır. Bu isə respublika üzrə ümumi göstəricidən 2,9 faiz çoxdur. Cinayət-axtarış xətti üzrə cinayətlərin açılması 94,3 faiz təşkil edir. Ayrı-ayrı şəxslərdən 1 kiloqramdan artıq heroin, digər narkotik və psixotrop maddələr götürülmüşdür.
Yığıncaqda qeyd olunmuşdur ki, şəxsi heyətin peşəkarlığına, operativliyinə və icra nizam-intizamına tələbkarlığın artırılması ilə yanaşı, onların fəaliyyəti üçün maksimal əlverişli şərait yaradılmışdır. İdarələrdə təmir işləri görülmüş, qızdırıcı sistem bərpa olunmuş, ofis mebeli və kompüterlər alınmışdır, polis əməkdaşlarının sosial-məişət şəraitinin yaxşılaşdırılmasına diqqət yetirilir. Onların fiziki hazırlığının yüksəldilməsi üçün müntəzəm iş görülür, maarifçilik işinə xüsusi diqqət verilir. Şəxsi heyət dövlətimizin başçısının yeni fərmanları ilə, normativ aktlarla vaxtında tanış olur.
Sumqayıt şəhər icra hakimiyyətinin başçısı Təvəkkül Məmmədov, eləcə də şəhər polis idarəsinin ayrı-ayrı bölmələrinin rəhbərləri yığıncaqda çıxış edərək şəhərdə sabitliyin qorunub saxlanmasında, habelə asayişin və vətəndaşların təhlükəsizliyinin təmin edilməsində polisin müsbət rolundan danışmışlar .
Respublikanın daxili işlər naziri, general-polkovnik Ramil Usubov yığıncaqda çıxış etmişdir. O, vurğulamışdır ki, Sumqayıt polisinin ötən ilki uğurları bütün əvvəlki illərin göstəricilərini arxada qoymuşdur. O, şəhər polis idarəsinin şəxsi heyətinə və bilavasitə onun rəisinə öz təşəkkürünü bildirmişdir. Nazir çıxışlarda qaldırılan məsələlərə dərhal öz münasibətini bildirmiş və idarənin texniki təchizatındakı bəzi problemləri nəzərə alaraq, onlara “Tofaş” markalı minik avtomobili, ixtisaslaşdırılmış “UAZ” avtomaşını, habelə 10 radiostansiya ayırmışdır. O, ümidvar olduğunu bildirmişdir ki, Sumqayıt polis idarəsinin əməkdaşları Azərbaycan polisinə daim qayğı göstərən Respublika Prezidenti, Ali Baş Komandan Heydər Əliyevin bütün tələb və göstərişlərini bundan sonra da rəhbər tutaraq, dövlətimizə və xalqımiza şərəflə xidmət edəcəklər.
Bölmənin digər xəbərləri
