Sumqayıtda “İlham Əliyev – 8 il hakimiyyətdə” kitabının ingiliscə nəşrinin təqdimatı olmuşdur
Sumqayıt, 19 dekabr (AZƏRTAC). Sumqayıt tarix muzeyində “İlham Əliyev - 8 il hakimiyyətdə” kitabının ingiliscə nəşrinin təqdimatı olmuşdur. Bu kitabın Azərbaycan dilində versiyası keçən il çap edilmişdir. Yüksək poliqrafik səviyyədə tərtib edilmiş kitab “Şərq-Qərb” nəşriyyatında buraxılmışdır. Kitab Sumqayıt İcra Hakimiyyətinin və Yeni Azərbaycan Partiyasının Sumqayıt şəhər Təşkilatının təşəbbüsü və təşkilati dəstəyi ilə nəşr edilmişdir.
AZƏRTAC xəbər verir ki, zəngin illüstrasiyalı bu analitik məcmuədə Azərbaycan Prezidenti İlham Əliyevin ölkəmizə rəhbərlik etməsinin səkkiz ilinə həsr edilmiş Sumqayıt şəhər elmi-praktiki konfransının materialları toplanmışdır. Kitaba daxil edilmiş materiallarda nəinki postsovet məkanında, həm də Avropa, dünya miqyaslı ən populyar liderlərdən birinin fəaliyyətindən bəhs edilir. Kitabdakı materiallar 21 mövzunu əhatə edir. Onların hər birində qlobal və regional çağırışlar fonunda Azərbaycanın inkişafını inamla idarə edən dövlət başçısının uğurlu fəaliyyətindən, ölkəmizin sürətli inkişafını nümayiş etdirən mütərəqqi islahatlardan, real nəticələrdən bəhs edilir. Kitabın müəlliflər kollektivi nüfuzlu dövlət məmurları, Milli Məclisin deputatları, alimlər, Sumqayıt müəssisələrinin rəhbərləri, şəhər ictimaiyyətinin nümayəndələridir. Sumqayıt İcra Hakimiyyətinin başçısı Eldar Əzizovun kitaba yazdığı ön sözdə deyilir: “İlham Əliyev hakimiyyətdə olduğu 8 il ərzində mümkün olmayanları da mümkün etmişdir. Ölkəmizdə artıq normaya çevrilmiş böyük tarixi hadisələr dünyada unikal təcrübə kimi qəbul edilir. Prezident İlham Əliyevin ölkəyə rəhbərlik etdiyi 8 il ərzində onun yaratdığı siyasi-iqtisadi inkişaf modeli özünün həyat qabiliyyətini, səmərəli və aktual olmasını əyani şəkildə nümayiş etdirmişdir”.
Eldar Əzizov təqdimat mərasimində bu kitabın yaradılması ideyasından söhbət açaraq demişdir: “İlham Əliyevin ölkəmizə rəhbərlik etdiyi 9 ilin təcrübəsi göstərir ki, bu illərin hər biri baş vermiş hadisələrin əhəmiyyətinə və fəth edilmiş zirvələrə görə bütöv bir epoxaya bərabərdir. Respublikanın nail olduğu sürətli transformasiyanın xarakteri və tempi dəyişikliklər proqramının əsasını təşkil edən konseptuallığın qanunauyğun nəticəsidir. Son illərdə Azərbaycan dünyanın siyasi, elmi və yaradıcı elitasının nümayəndələrinin iştirakı ilə əlamətdar inteqrasiya layihələrinin həyata keçirilməsi üçün fəal məkana çevrilmişdir. Respublika öz iqtisadi potensialını sürətlə inkişaf etdirməklə regional əməkdaşlığın güclənməsinə təkan verir, dünya arenasında öz mövqelərini möhkəmlədir. Heç şübhəsiz, bunlar ümummilli lider Heydər Əliyevin strategiyasının və dövlət başçısının fəaliyyətinin uğurudur”.
Təqdimat mərasimində iştirak edən qonaqlar: Milli Məclisin deputatları - tanınmış yazıçı-publisist Elmira Axundova, professor Musa Qasımlı, “Azərbaycan” qəzetinin redaktoru Bəxtiyar Sadıqov, tarix elmləri doktoru Musa Quluzadə və başqaları bu kitabın ingilis dilinə tərcüməsinin əhəmiyyətini vurğulayaraq qeyd etmişlər ki, bu nəşr xarici oxucuların ölkəmizin inkişaf vüsətini qiymətləndirməsinə, Azərbaycan iqtisadi modelinin uğurlu olmasına, Prezident İlham Əliyevin ardıcıl surətdə həyata keçirdiyi hərtərəfli inkişafa oxucuları inandırmağa imkan verəcəkdir. Kitab ekspertlər və tədqiqatçılar üçün son dərəcə maraqlıdır, Azərbaycanın nailiyyətlərinin öyrənilməsində və təbliğ edilməsində əvəzsiz rol oynayacaqdır.
Sonda tədbir iştirakçılarına “İlham Əliyev - 8 il hakimiyyətdə” kitabının ingiliscə nüsxələri hədiyyə edilmişdir.
Bölmənin digər xəbərləri
