Bakı, 27 sentyabr, AZƏRTAC

2020-ci il 27 sentyabr. Bu gün müasir Azərbaycan tarixinin qızıl səhifəsinin ilk sətrinin yazıldığı gündür. Məğrur olduğu qədər hüznlü, hüznlü olduğu qədər qürurlu və şərəfli, xalqın uzun illər boyu arzuladığı gün. Əlbəttə, onilliklər boyu arzulanmış gün öz-özünə yetişmir, onu yetişdirən yollar, o yolları düşünən zəka, çəkən əllər vardır! Sözü imzası qədər keçərli, siyasi iradəsi, prinsipiallığı, uzaqgörənliyi ilə ən yeni Azərbaycan tarixinə öz möhürünü vurmuş və gələcək nəsillərə parlaq inkişaf yolu açmış lider - Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev üç il bundan öncə, 2020-ci il 27 sentyabr, səhərin erkən saatlarında düşmənin növbəti hücumuna qarşı Orduya bütün cəbhəboyu əks-hücum əmri verməklə, təkcə Azərbaycan tarixində deyil, bütövlükdə bölgənin və Türk dünyasının tarixində yeni səhifə açmış oldu.

Bu fikirləri AZƏRTAC-a müsahibəsində Bakı Dövlət Universitetinin Tarix fakültəsinin dekan müavini Kəmalə Nəcəfova söyləyib. K.Nəcəfova deyib: “2020-ci il 27 sentyabr. Həmin gün 2016-cı ilin Aprel döyüşlərindən 4 il, 2018-ci ilin mayındakı Günnüt hərbi əməliyyatından 2 il, Tovuz döyüşlərindənsə, cəmi 2 ay keçirdi. Dünya hərb tarixində hər günü düşmənin məğlubiyyəti ilə tarixə düşən bir müharibə olmamışdı. Cəmi 44 gün ərzində 30 illik işğala son qoyuldu, düşmən darmadağın edilib məğlub oldu. Lakin bədnam siyasətçilər tərəfindən şirnikləndirilən təcavüzkar dövlət 2020-ci il 10 noyabr üçtərəfli Bəyanatın maddələrinin icrasını təmin etmək əvəzinə, gizli şəkildə silahlanmağa, revanşizmin təbliğinə üstünlük verdi. Ötən ilin sentyabrında Daşkəsən, Kəlbəcər, Laçın sərhədləri boyu təxribatlar törətdi, mina terroruna əl atdı. Deyəsən düşmən yenə yolunu azmışdı, əlbət! Bu ilin aprelində Laçın rayonunun Həkəri körpüsü üzərində - Ermənistanla şərti dövlət sərhədində sərhəd-buraxılış məntəqəmiz qurulanda məsələnin ciddiyyətini anlayıb, yenə başladılar sərsəm bəyanatlar verməyə... Ta ki, 19 sentyabrda 4 polisimiz, 2 mülki vətəndaşımız mina qurbanı olana qədər. Həmin gün lokal antiterror tədbirlərinə başlayan ordumuz cəmi 23 saat 43 dəqiqə içində Ermənistan silahlı qüvvələrinin tör-töküntülərinə diz çökdürdü. Dəmir yumruğun zərbəsini növbəti dəfə öz başında görüncə dirənişin mənasızlığını anlayan düşmən ağ bayraq qaldırmağa məcbur oldu. 2023-cü il 20 sentyabr axşamı xalqa müraciət edən Müzəffər Ali Baş Komandan bundan sonra görüləcək işlərin anonsunu verdi.

Bəs, antiterror tədbirlərinin nəticəsi nə oldu? Birincisi, dövlətimiz suverenliyini bütün Azərbaycan ərazisi boyunca bərpa etməyə nail oldu. İkincisi, antiterror tədbirləri ordumuzun peşəkarlığını bir daha bütün dünyaya göstərdi. Yüksək peşəkarlıq və qəhrəmanlıq göstərən hərbçilərimiz qısa müddət ərzində bütün istiqamətlər üzrə ciddi hərbi uğurlar əldə etdi, götürdüyü öhdəliyə baxmayaraq, Azərbaycan ərazisində qanunsuz yerləşdirilmiş və bu günə qədər çıxarılmamış Ermənistan ordusunun böyük bir hissəsini və hərbi texnikasını tamamilə məhv etdi. Üçüncüsü, antiterror tədbirləri mühüm bir tarixi hadisəyə də vəsilə oldu: 44 günlük Zəfər yürüşündən sonra, 2020-ci ildə BMT-nin 4 Qətnaməsini təkbaşına icra edən dövlətimiz bu dəfə də təkbaşına 10 noyabr 2020-ci il üçtərəfli Bəyanatın icra olunmamış maddəsinin icrasını təmin etməyi bacardı.

“Və ən əsası...3 gün əvvəl şəhid qardaşım, I Qarabağ müharibəsinin qəhrəman giziri Hüseynov Vasif Telman oğlunun düz 31 il əvvəl son damla qanına qədər uğrunda vuruşduğu yüksəkliyin şanlı Azərbaycan Ordusunun nəzarətinə keçdiyi xəbərini aldım. Bir tək onu bilirəm ki, həsrət bitdi. Bir şəhid bacısı olaraq mən ancaq bundan sonra işğaldan azad olunmuş Qarabağ və Şərqi Zəngəzura səfər edə bilərəm, ilk səfərim də həmin yüksəkliyi ziyarət etməklə başlayacaq... Qoy bu müqəddəs gündə - Anım Günündə Azərbaycanın Respublikasının suverenliyi uğrunda, haqq-ədalət uğrunda öz canını fəda etmiş qardaşlarımızın əziz ruhları şad olsun, onların şərəfli yolunu davam etdirənlərə bu Vətənin havası, suyu, çörəyi halal olsun!”,- deyə K.Nəcəfova bildirib.