Tbilisinin qədim məhəllələrinin birində Azərbaycan gecəsi keçirilmişdir
Tbilisi, 1 oktyabr (AZƏRTAC). Tbilisi şəhərinin qədim məhəllələrindən birində, azərbaycanlı iş adamına məxsus şadlıq sarayında “Azərbaycan gecəsi” keçirilmişdir.
Gürcüstan Mədəniyyət və Abidələrin Mühafizəsi Nazirliyinin təşəbbüsü, “Dialoq və İnkişaf” fondunun təşkilatçılığı ilə reallaşdırılan tədbirdə Azərbaycan və gürcü ictimaiyyətinin nümayəndələri iştirak etmişlər.
“Dialoq və inkişaf” fondunun rəhbəri Ramilə Əliyeva AZƏRTAC-a bildirmişdir ki, bu günlərdə Gürcüstan mədəniyyət və abidələrin mühafizəsi naziri Quram Odişaria ilə keçirilən görüşdə bu ölkədə Azərbaycan mədəniyyətinin daha geniş təbliği ilə bağlı tədbirlər planı barədə nazirə məlumat verilmişdir. Azərbaycan gecəsi həmin tədbirlər planının bir hissəsidir.
Bu cür tədbirlərin davamı olaraq yaxın vaxtlarda Gürcüstanda daha böyük miqyasda Aşıqlar festivalı keçiriləcəkdir. Festivala türkdilli ölkələrdən də aşıqların dəvət olunacağı nəzərdə tutulmuşdur. Fond bu yolla qədim aşıq sənətini daha geniş təbliğ etmək, yeni, gənc istedadları üzə çıxarmaq, eləcə də gənclərin bu sənətə marağını artırmaq niyyətindədir.
R.Əliyeva vurğulamışdır ki, gecədə milli mətbəximiz, rəqslərimiz və mahnılarımız nümayiş etdirilmişdir. Qonaqlar müxtəlif növ plovlarımızı çox yaxşı qarşılamışlar.
Bakıdan gəlmiş pianoçu Nizami Əliyevin ifaları, “Sarı gəlin” ritmləri altında rəqs və başqa musiqi nömrələri də iştirakçılar tərəfindən alqışlarla qarşılanmışdır.
Gürcüstan mədəniyyət və abidələrin mühafizəsi nazirinin məsləhətçisi Georgi Gegeçkori belə maraqlı gecənin təşkilatçılarına minnətdarlığını bildirmiş və Gürcüstanda Azərbaycan mədəniyyətinin təbliği istiqamətində gələcəkdə də buna bənzər tədbirlərin dəstəklənəcəyini vurğulamışdır.
G.Gegeçkori Azərbaycan mətbəxinə, musiqisinə yaxşı bələd olduğunu qeyd etmiş və bu gün də çox dadlı xörəklər, gözəl rəqslər, mahnılar nümayiş etdirildiyindən məmnunluq duyduğunu bildirmişdir.
İslam Əliyev
AZƏRTAC-ın xüsusi müxbiri
Tbilisi
Bölmənin digər xəbərləri
