SİYASƏT
TDT-nin gələcəyinə inamın formalaşmasında Azərbaycanın böyük rolu var - ŞƏRH
Bakı, 25 avqust, AZƏRTAC
Özbəkistan Prezidenti Şavkat Mirziyoyevin Azərbaycana dövlət səfəri iki ölkə arasındakı münasibətləri daha da inkişaf etdirəcək. Özbəkistanla münasibətlərimiz tarixi keçmişə bağlıdır. Xalqlarımızı birləşdirən milli kimlik, etnik tərkib və böyük mədəniyyət var. Müstəqillik əldə etdikdən sonra siyasi və iqtisadi müstəvidə də əlaqələr sürətlə qurulmağa başlayıb. Özbəkistanla münasibətlərimiz həm ikitərəfli, həm də üzv olduğumuz beynəlxalq təşkilatlar vasitəsilə uğurla həyata keçirilir. Hər iki ölkə Türk Dövlətləri Təşkilatının (TDT) aktiv üzvü olmaqla yanaşı, bu birliyin inkişafında marağı olan, qurumun gələcəyinə inanan, güc mərkəzinə çevriləcəyini görən ölkələrdir. Həm Özbəkistan, həm də Azərbaycan yerləşdiyi coğrafi mövqeyin verdiyi üstünlüklərdən istifadə edərək əlaqələrini daha da inkişaf etdirir və yeni dünya düzənində Şərq-Qərb, Böyük İpək Yolu kimi layihələrdə önəmli rola malikdirlər. Ona görə də Azərbaycan Özbəkistan münasibətləri təkcə bu iki dövlətin yox, Şərq-Qərb dəhlizindən istifadə edən ölkələrin də maraq və diqqət mərkəzindədir.
Bu sözləri AZƏRTAC-a açıqlamasında Ana Vətən Partiyası sədrinin müavini, politoloq Yalçın Hacızadə söyləyib.
Onun sözlərinə görə, iki ölkə arasında münasibətlərin yüksək səviyyəyə çatmasında dövlət başçılarının şəxsi münasibətləri də mühüm rol oynayıb. Ölkə prezidentləri müxtəlif beynəlxalq tədbirlərdə də tez-tez görüşürlər. 2022-ci ildə Prezident İlham Əliyev üç dəfə Özbəkistana səfər edib. Bu səfərlər həm ikitərəfli, həm də beynəlxalq təşkilatların Zirvə görüşü məqsədilə həyata keçirilib. Bu görüşlər zamanı əldə edilmiş razılaşmalarla iki ölkə arasında ticarət, energetika, maşınqayırma, logistika, turizm və digər sahələrdə sürətli artım var. Bu imkanlar və qurulan əlaqələr ölkələrimiz arasında ticarət dövriyyəsinin bir milyard ABŞ dollarına qədər yüksəlməsinə imkan verəcək.
“İki ölkə arasındakı inkişafda, bu əlaqələrin gələcəyinə inamın yaranmasında Azərbaycanın Qarabağ Zəfərinin və digər qardaş ölkəmiz olan Türkiyə ilə yüksək münasibətlərimizin də böyük rolu var. Azərbaycanın Türkiyə ilə qurduğu strateji müttəfiqliyin səviyyəsi ölkələrimiz qarşısında duran problemlərin həllinə gətirdiyi üçün digər türk dövlətlərinə stimul olaraq Türk Dövlətləri Təşkilatına daxil olan dövlətlərin daha da sıx münasibətdə olmasını şərtləndirdi. Ümumiyyətlə, qeyd edim ki, Azərbaycanın Mərkəzi Asiyada yerləşən türk dövlətlərinin TDT-nin gələcəyinə inanmasında böyük rolu vardır.
Səfər çərçivəsində Özbəkistan Prezidentinin işğaldan azad edilmiş Qarabağda olması, Füzuli rayonunda onun təşəbbüsü ilə tikilən və özbək xalqının dahi mütəfəkkiri, alimi və dövlət adamı olan Mirzə Uluqbəyin adını daşıyan məktəb binasının açılışını etməsi, daha sonra Türk dünyasının mədəniyyət beşiyi olan Şuşanı ziyarət etməsi iki ölkə xalqının, dövlətinin biri-birinə olan münasibətinin göstəricisidir. Səfər zamanı diqqət çəkən və qürurverici hallardan biri də Prezident Şavkat Mirziyoyevin də ictimaiyyətlə görüşü zamanı özbək dilində danışması oldu. Xatırladım ki, 2022-ci ildə də Prezident İlham Əliyev Özbəkistana səfər zamanı Azərbaycan dilində danışmışdı. Hesab edirəm ki, bununla da türk xalqları üçün vahid dil və əlifba məsələsinin təməli atılıb”, - deyə politoloq vurğulayıb.