Təbii fəlakət Qaraməryam-İsmayıllı-Şəki avtomobil yolunda dağıntılara səbəb olmuşdur
İsmayıllı, 10 iyul (AZƏRTAC). İyulun 9-da axşam saat 19.00-dan ayın 10-u səhər saat 9-00- dək davam edən güclü leysan yağışları nəticəsində yaranan sel suları Qaraməryam-İsmayıllı-Şəki avtomobil yolunun 41-42-ci kilometrində dağıntılara səbəb olmuşdur.
AZƏRTAC xəbər verir ki, təbii fəlakət nəticəsində həmin ərazidə yolun təqribən 1,5 kilometr hissəsi uçmuşdur. Ərazi sel sularının dağlardan gətirdiyi ağac kötükləri, kol-kos və digər töküntülərlə örtülmüş, nəticədə yolda nəqliyyatın hərəkəti dayandırılmışdır.
İsmayıllı Rayon Fövqəladə Hallar Komissiyası tərəfindən həyata keçirilən operativ tədbirlər nəticəsində səhərə yaxın yolda hərəkət bərpa edilmişdir.
Hazırda yolun dağılmış hissəsində işlər davam etdirilir.
Bölmənin digər xəbərləri
